பெண்கள், குழந்தைகள் பாதுகாப்புக்கு போலீசில்... அக்கா படை!: முதல் கட்டமாக 5 மாவட்டங்களில் துவக்கம்

பெங்களூரு அரண்மனை மைதானத்தில் மகளிர், குழந்தைகள் மேம்பாடு, மாற்றுத்திறனாளிகள், மூத்த குடிமக்கள் அதிகாரமளித்தல் துறை சார்பில் கர்நாடகாவில் ஐ.சி.டி.எஸ்., எனும் விரிவான குழந்தை மேம்பாட்டுத் திட்டத்தின் பொன்விழா, குழந்தைகள் தினம், உலக மூத்த குடிமக்கள் தினம் ஆகியவை நேற்று கொண்டாடப்பட்டது. விழாவை, குழந்தைகளுடன் சேர்ந்து முதல்வர் சித்தராமையா, துணை முதல்வர் சிவகுமார் ஆகியோர் குத்துவிளக்கு ஏற்றித் துவக்கிவைத்தனர். விழாவில் பெங்களூரு உட்பட ஐந்து மாவட்டங்களில் 'அக்கா படை'யை முதல்வர் சித்தராமையா துவக்கி வைத்தார். இப்படை குறித்து பெண்கள், குழந்தைகள் நலத்துறை அதிகாரி ஒருவர் கூறியதாவது: கர்நாடகாவில் பெண்கள், குழந்தைகள் மீதான குற்றச்சம்பவங்கள் அதிகரித்து வருகின்றன. இதை தடுக்க மாநில அரசு பல நடவடிக்கைகள் மேற்கொண்டுள்ளன. பீதரில் 2023ல் முன்மாதிரியாக 'அக்கா படை'யை, மாவட்ட எஸ்.பி.,யாக இருந்த சன்னபசவண்ணா லங்கோட்டி துவக்கி வைத்தார். இப்படை, பெண்கள், குழந்தைகளுக்கு எதிராக நடக்கும் வன்முறையை தடுக்கவும், அவசரகால சூழ்நிலைகளில் உடனடியாக உதவும். முதல்கட்டமாக உடுப்பி, மங்களூரு, பெங்களூரு, மைசூரு, பெலகாவி ஆகிய ஐந்து மாவட்டங்களில் அமைக்கப்பட்டுள்ளது. பின், படிப்படியாக மற்ற மாவட்டங்களுக்கும் விரிவுபடுத்தப்படும். ஒவ்வொரு படையிலும் பயிற்சி பெற்ற காவல் துறையினர், என்.சி.சி., மாணவியர் இருப்பர். இவர்கள், பஸ் நிலையம், கல்லுாரிகள், விடுதிகள், மால்கள் என, பொது இடங்களில் ரோந்து பணியில் ஈடுபட்டிருப்பர். இது தவிர, கல்வி நிறுவனங்களுக்கு சென்று, 'போக்சோ' சட்டம், குழந்தை திருமணம், போக்குவரத்து விதிகள், போதைப்பொருள் பின் விளைவுகள், அவசர உதவி எண்கள் ஆகியவை குறித்து, மாணவர்களிடம் விழிப்புணர்வு ஏற்படுத்துவர். வன்முறைக்கு ஆளான பெண்கள், குழந்தைகளுக்கு ஆதரவு அளிப்பர். சமூகத்தில் இரக்கமும், சேவை மனப்பான்மை கொண்ட பெண்களுக்கு ஒரு தளத்தை உருவாக்கவே, இந்த படையின் நோக்கம். போலீஸ் துறையின் 'ஹொய்சாலா' ரோந்து படைகள் போன்று, இப்படையினர் காலை 9:00 முதல் இரவு 7:00 மணி வரை பொது இடங்களில் ரோந்து பணியில் ஈடுபடுவர். ஹொய்சாலா வாகனங்கள் மாதிரியில், இவர்களுக்கு வழங்கப்பட்ட வாகனங்களும் மாற்றி அமைக்கப்பட்டுள்ளன. ஒவ்வொரு படையிலும் இரண்டு பெண் போலீஸ் ஏட்டுகள், பயிற்சி பெற்ற என்.சி.சி., படையினர் உட்பட 35 முதல் 45 வயதுக்கு உட்பட்ட ஆறு முதல் 10 உறுப்பினர்கள் இருப்பர். இவர்கள் மாவட்ட எஸ்.பி., கமிஷனரின் வழிகாட்டுதலின் கீழ் வன்முறை வழக்குகளை கையாள்வது, சட்டம் - ஒழுங்கை பராமரிப்பது உட்பட சிறப்பு பயிற்சி அளிக்கப்படும். என்.சி.சி., மகளிர் படையினருக்கு மாதந்தோறும் கவுரவ ஊதியம் வழங்கப்படும். இவர்களுக்கு கமாண்டோ சீருடை வழங்க முடிவு செய்யப்பட்டு உள்ளது. இதற்காக 110 கோடி ரூபாய் ஒதுக்கப்பட்டுள்ளது. இப்படையினர், பொது இடங்களில் பெண்கள், குழந்தைகளை துன்புறுத்துபவர்களை பிடித்து, அப்பகுதி போலீஸ் நிலையத்தில் ஒப்படைப்பர். இவ்வாறு அவர் கூறினார்.