வீட்டில் ரூ.1.17 கோடி திருட்டு பக்கத்து வீட்டு நபர் மீது சந்தேகம்

எலக்ட்ரானிக் சிட்டி: வீட்டின் அலமாரியில் இருந்த 1.17 கோடி ரூபாய் திருடு போன வழக்கில், பக்கத்து வீட்டுக்காரரை போலீசார் தேடி வருகின்றனர். பெங்களூரு, தொட்டதோகூரில் உள்ள அடுக்குமாடி குடியிருப்பில் வசித்து வருபவர் இ.எஸ்.ரெட்டி, 40. இவர், சர்ஜாபூர் பகுதியில் சொந்தமாக வீடு கட்டுகிறார். இதற்காக, தன் உறவினர்களிடமிருந்து பணத்தை வாங்கி, வீட்டின் அலமாரியில் வைத்திருந்தார். அவசர செலவுக்காக, சில நாட்களுக்கு முன்பு பணத்தை எடுக்க அலமாரியை திறந்தார். அங்கு பணம் இல்லாததை பார்த்து அதிர்ச்சி அடைந் தார். வீட்டில் அனைத்து இடங்களிலும் தேடியும், பணம் கிடைக்காததால் கடந்த செவ்வாய்க்கிழமை எலக்ட்ரானிக் சிட்டி போலீஸ் நிலையத்தில் புகா ர் அளித்திருந்தார். அவரது வீட்டின் மெயின் கதவு 'ஹைடெக்' முறையில் செய்யப்பட்டுள்ளது. ரெட்டியின் கைரேகை அல்லது ரகசிய எண்களை உள்ளிட்டால் மட்டுமே கதவை திறக்க முடியும். அப்படி இருக்கையில் ரகசிய எண் தெரிந்த யாரோ ஒருவர் தான் பணத்தை திருடி இருக்க முடியும். இவரது பக்கத்து வீட்டுக்காரருக்கு கதவை திறக்கும் ரகசிய எண் தெரியும். அவர் தன் வீட்டை இம்மாத இறுதியில் காலி செய்ய உள்ளதாக பல மாதங்களுக்கு முன்பே ரெட்டியிடம் கூறியிருந்தார். ஆனால் முன்கூட்டியே யாரிடமும் சொல்லாமல் வீட்டை காலி செய்துவிட்டு சென்றுவிட்டார். அவர் மீது சந்தேகம் எழுந்துள்ளதாக ரெட்டி தெரிவித்திருந்தார். அவரை போலீசார் தேடி வருகின்றனர்.