செய்யூர் மின் வாரிய நிலம் சிப்காட் வசம் ரூ.265 கோடியில் 850 ஏக்கர் ஒப்படைப்பு

சென்னை:செங்கல்பட்டு மாவட்டத்தில், செய்யூர் அனல்மின் திட்டத்திற்கு கையகப்படுத்தப் பட்ட, 850 ஏக்கர் நிலத்தில் தொழில் பூங்கா அமைக்கப்பட உள்ளது. இதற்காக அந்த இடம், 'சிப்காட்' வசம் ஒப்படைக்கப்பட்டு உள்ளது. செய்யூரில், 4,000 மெகா வாட் திறனில் தனியாருடன் இணைந்து, அனல்மின் நிலையம் அமைக்க, மத்திய அரசு முடிவு செய்தது. இதிலிருந்து தமிழகத்திற்கு, 1,600 மெகா வாட்டும்; மீதி மின்சாரம், பிற மாநிலங்களுக்கும் ஒதுக்கப்பட இருந்தது. திட்ட செலவு, 25,970 கோடி ரூபாய். மின் நிலையத்தின் கட்டுமான பணிக்கு, 2013ல் மத்திய அரசு தரப்பில், 'டெண்டர்' கோரப்பட்டது. இதில், என்.டி.பி.சி., எனப்படும் தேசிய அனல்மின் கழகம் உட்பட பல தனியார் நிறுவனங்கள் அதில் பங்கேற்றன. அந்நிறுவனங்கள், 'மின் கொள்முதல் ஒப்பந்த காலம் முடிவடைந்த பின், மின் நிலையத்தை அரசிடம் ஒப்படைக்க வேண்டும்' உள்ளிட்ட நிபந்தனையை தளர்த்துமாறு கோரிக்கை விடுத்தன. இதை, அரசு ஏற்கவில்லை. இதனால், என்.டி.பி.சி., தவிர மற்ற நிறுவனங்கள் டெண்டரில் இருந்து விலகுவதாக அறிவித்தன. பின், 2014ல் டெண்டர் ரத்து செய்யப்பட்டது. செய்யூர் மின் திட்டம் தாமதமானதால் தமிழகம் தவிர்த்த, மற்ற மாநிலங்கள், அதில் மின்சாரம் வாங்குவதில் இருந்து வெளியேறின. இதனால், அத்திட்டம் கைவிடப்பட்டது. செய்யூர் மின் திட்டத்தை, 'பவர் பைனான்ஸ்' நிறுவனத்தின் துணை நிறுவனமான, 'கோஸ்டல் தமிழக பவர்' மேற்கொள்ள இருந்தது. மின் திட்டத்திற்கு நிலம் கையகப்படுத்தும் பணியை வருவாய் துறை வாயிலாக, தமிழக மின் வாரியம் மேற்கொண்டது. இதற்கு, 850 ஏக்கர் நிலம் கையகப்படுத்தப்பட்டு உள்ளது. செய்யூர் மின் திட்டம் கைவிடப்பட்டதால், அந்த இடத்தில், சிப்காட் வாயிலாக தொழில் பூங்கா அமைக்க, தமிழக அரசு முடிவு செய்துள்ளது. இதனால், கையகப்படுத்திய இடத்தை தற்போது சிப்காட் நிறுவனம் வசம் மின் வாரியம் ஒப்படைத்துள்ளது. இதற்கு சிப்காட், 265 கோடி ரூபாய் செலுத்த வேண்டும்.