ரூ.450 லட்சம் கோடி பொருளாதாரம் இலக்கை எட்ட ஓராண்டு தாமதமாகும் ஐ.எம்.எப்., அறிக்கையில் தகவல்

புதுடில்லி:இந்தியப் பொருளாதாரம் 2028- - 29ல், 450 லட்சம் கோடி ரூபாயாக உயரும் என்று ஐ.எம்.எப்., அறிக்கை தெரிவித்துள்ளது. அதில் மேலும் கூறியுள்ளதாவது: இந்திய பொருளாதாரம், கணித்ததைவிட ஓராண்டு தள்ளிப்போய், 2027 - 28ல் 5 டிரில்லியன் டாலர் அளவுக்கு வளரும் என கருதப்பட்டது. ஆனால், அது மேலும் ஓராண்டு தாமதம் ஆக, ஜி.டி.பி., வளர்ச்சி வேகம் குறைவு, டாலருக்கு எதிரான இந்திய ரூபாயின் மதிப்பு சரிவு ஆகியவை காரணங்கள் ஆகும். ஐ.எம்.எப்.,பின் கணிப்பின்படி, நம் நாட்டின் பொருளாதாரம் 2025- - 26ல், 360 லட்சம் கோடி ரூபாயாக இருக்கும். இது, 2027- - 28ல் 443 லட்சம் கோடி ரூபாயாக உயரும். அதாவது, 450 லட்சம் கோடி ரூபாய் என்ற இலக்கு சற்றே தாமதப்படும். பின்னர், 2028 - -29ல் அந்த இலக்கு எட்டப்பட்டுவிடும். கடந்த 2023ல் டாலருக்கு எதிரான இந்திய ரூபாயின் மதிப்பு 82.50 ரூபாயாக இருக்கும் என்று ஐ.எம்.எப்., அறிக்கையில் கூறப்பட்டிருந்தது. அது, 2024- - 25ல் 84.60 ரூபாயாக மாற்றியமைக்கப்பட்டது. அதேபோல, 2025 - -26ம் ஆண்டில், டாலருக்கு எதிரான ரூபாயின் மதிப்பு 87 ரூபாயாகவும், 2026- - 27ல் 87.70 ரூபாயாகவும் சரியும் எனவும் கணிக்கப்பட்டுள்ளது. பொருளாதார வளர்ச்சி சற்றே தேக்கமடைந்தாலும், விரைவாக வளரும் பெரிய பொருளாதார நாடுகளுள் ஒன்றாக இந்தியா திகழ்கிறது. இவ்வாறு அதில் கூறப்பட்டுள்ளது.