பிழையான தேர்தல் புள்ளிவிபரம் கொடுத்த தேர்தல் ஆய்வாளர் மீது வழக்குபதிய தடை

புதுடில்லி: மஹாராஷ்டிரா தேர்தல் தொடர்பாக, பிழையான புள்ளி விபரங்களை வெளியிட்டு சர்ச்சைக்கு காரணமான தேர்தல் ஆய்வாளர் சஞ்சய் குமார் மீது வழக்குப்பதிவு செய்ய உச்ச நீதிமன்றம் இடைக்கால தடை விதித்து உள்ளது. விமர்சனம் தேர்தல் ஆய்வாளரான சஞ்சய் குமார், சி.எஸ்.டி.எஸ்., எனப்படும் வளர்ந்து வரும் சமூகங் களுக்கான ஆய்வு மையத்தின் இணை இயக்குநராக உள்ளார். இவர், மஹாராஷ்டிராவில், கடந்த ஆண்டு நடந்த சட்ட சபை தேர்தல் குறித்த புள்ளி விபரங்களை கடந்த 17ம் தேதி, சமூக வலைதளத்தில் வெளியிட்டார். இதை வைத்து ஓட்டு திருட்டு நடந்ததாக குற்றஞ்சாட்டி, மத்திய அரசு மற்றும் தேர்தல் கமிஷனை காங்கிரஸ் கட்சியை சேர்ந்த லோக்சபா எதிர்க்கட்சி தலைவர் ராகுல் கடுமையாக விமர்சித்து இருந்தார். இதனால், இந்த விவகாரம் அரசியலில் பெரும் புயலை கிளப்பியது. இதையடுத்து, கடந்த 19ம் தேதி அந்த புள்ளி விபரங்கள் அனைத்தும் பிழையானவை என கூறிய சஞ்சய்குமார், முன்னதாக பதிவிட்டிருந்த தரவுகளை சமூக வலைதளப் பக்கத்தில் இருந்து நீக்கினார். இதற்காக பகிரங்கமாக மன்னிப்பும் கோரினார். பொறுப்பான பதவியில் இருந்து கொண்டு தவறான தகவல்களை அளித்ததால், சஞ்சய் குமார் மீது நடவடிக்கை எடுக்கக் கோரி நாக்பூரின் ராம்டெக் மற்றும் நாசிக்கின் தியோலாலி போலீஸ் ஸ்டேஷன்களில் புகார் அளிக்கப்பட்டது.

அதிர்ச்சி

அதன் அடிப்படையில் அவர் மீது போலீசார் வழக்குப் பதிவு செய்தனர். இதனால், அதிர்ச்சியடைந்த சஞ்சய் குமார் தனக்கு எதிராக பதிவு செய்யப்பட்ட வழக்குகளை ரத்து செய்யக் கோரி, உச்ச நீதிமன்றத்தில் மனுத் தாக்கல் செய்திருந்தார். இம்மனு உச்ச நீதிமன்ற தலைமை நீதிபதி பி.ஆர்.கவாய், நீதிபதி அஞ்ஜாரியா அமர்வு முன் நேற்று விசாரணைக்கு வந்தது. அப்போது, சஞ்சய் குமார் தரப்பில் ஆஜரான வழக்கறிஞர், '30 ஆண்டு களாக தேசப் பணியில் இருக்கிறார். 'உயர்வாக மதிக்கப்படும் நபர் அவர். இது முற்றிலும் மனிதப் பிழை. அதற்காக சஞ்சய் குமார் மன்னிப்பு கேட்டுவிட்டார். சமூக வலைதளப் பக்கத்தில் இருந்தும் அந்த பதிவை நீக்கிவிட்டார்' எ ன, விளக்கம் அளித்தார். இதை ஏற்றுக் கொண்ட நீதிபதிகள், சஞ்சய் குமார் மீது வழக்குப்பதிவு செய்வதற்கு இடைக்கால தடை விதித்து உத்தர விட்டனர்.