பெண் பயனாளிகளுக்கு ரூ.1,000 கோடி நிதியை வழங்கினார் பீஹார் முதல்வர் நிதிஷ்

பாட்னா: முதல்வரின் மகளிர் வேலைவாய்ப்பு திட்டத்தின் கீழ் தேர்வு செய்யப்பட்ட, 10 லட்சம் பெண்களுக்கு தலா 10,000 ரூபாய் வீதம் 1,000 கோடி ரூபாய் நிதியை, பீஹார் முதல்வர் நிதிஷ் குமார் நேற்று வழங்கினார். பீஹாரில், பெண்கள் சுயதொழில் துவங்க உதவும் வகையில், 10,000 ரூபாய் நிதியுதவி வழங்கும் திட்டத்தை, கடந்த செப்டம்பரில் பிரதமர் மோடி துவக்கி வைத்தார். 'முதல்வரின் மகளிர் வேலைவாய்ப்பு திட்டம்' என பெயரிடப்பட்ட இந்த திட்டத்தின் கீழ், 75 லட்சம் பெண்கள் தொழில் துவங்குவதற்கு முதற்கட்டமாக தலா, 10,000 ரூபாய் வழங்கப்படும் என அறிவிக்கப்பட்டது. அமோக வெற்றி இதையடுத்து, இந்த மாத துவக்கத்தில் நடந்த சட்டசபை தேர்தலில் பா.ஜ., தலைமையிலான தேசிய ஜனநாயக கூட்டணி அமோக வெற்றி பெற்றது. இதையடுத்து, பா.ஜ., - ஐக்கிய ஜனதா தள கூட்டணி அங்கு மீண்டும் ஆட்சி அமைத்தது. முதல்வராக நிதிஷ் குமார் தேர்வு செய்யப்பட்டார். சமீபத்தில் புதிய அமைச்சரவை பொறுப்பேற்றது. இந்நிலையில், இந்த திட்டத்தின் கீழ் தேர்வு செய்யப்பட்ட பெண்களுக்கான தொகையை முதல்வர் நிதிஷ் குமார் நேற்று வழங்கினார். பாட்னாவில், அவர் இல்லத்தில் நடந்த நிகழ்ச்சியில், தேர்வு செய்யப்பட்ட 10 லட்சம் பெண்களுக்கு, தலா 10,000 ரூபாயை, அவரவர் வங்கி கணக்குகளில் செலுத்தினார். இதன் வாயிலாக 1,000 கோடி ரூபாய் வழங்கப்பட்டுள்ளது. சுயதொழில் நிகழ்ச்சிக்கு பின் பேசிய மாநில ஊரக வளர்ச்சி துறை அமைச்சர் ஷ்ரவன் குமார் கூறுகையில், “இந்த திட்டத்தின் கீழ், இதுவரை, 1.56 கோடி பெண்கள் நிதியுதவி பெற்றுள்ளனர். “இந்த தொகையை வைத்து, பயனாளிகள் சுயதொழில் துவங்க வேண்டும் என்பதே இந்த திட்டத்தின் நோக்கம். அதை சிறப்பாக செய்பவர்களுக்கு விரைவில் தலா, 2 லட்சம் ரூபாய் வட்டியில்லா கடன் வழங்கப்படும்,'' என்றார். நடந்து முடிந்த சட்டசபை தேர்தலில், பெண்கள் அதிகளவில் ஓட்டளித்ததாக கூறப்படுகிறது. இதற்கும், தேசிய ஜனநாயக கூட்டணி வெற்றி பெற்றதற்கும் இந்த திட்டமே முக்கிய காரணம் என்ற கருத்தும் பீஹார் அரசியலில் நிலவி வருகிறது.