சைபர் மோசடி: கோவாவில் 507 இணையதளம் முடக்கம்

பணஜி: டிஜிட்டல் கைது உள்ளிட்ட சைபர் மோசடியில் ஈடுபட்ட, 507 இணையதளங்கள் மற்றும் 767 மொபைல் போன் எண்களை கோவா போலீசார் முடக்கியுள்ளனர். ஆன்லைன் மோசடிகளை தடுக்கும் வகையில், கோவா சைபர் குற்றப் பிரிவு போலீசார் தீவிர நடவடிக்கைகள் எடுத்து வருகின்றனர். அதன் ஒரு பகுதியாக, ஆன்லைன் மோசடியில் ஈடுபட்ட 507 இணையதளங்கள், மோசடிக்கு பயன்படுத்திய, 767 மொபைல் போன் எண்கள் முடக்கப்பட்டுள்ளன. இது குறித்து கோவா சைபர் குற்றப்பிரிவு போலீஸ் எஸ்.பி., ராகுல் குப்தா கூறியுள்ளதாவது: போலி பார்சலை தருவதாக கூறி மோசடி, ஆன்லைனில் முதலீடு செய்தால் அதிக லாபம் கிடைக்கும் என ஏமாற்றுதல், பாலியல் மிரட்டல், டிஜிட்டல் கைது செய்துள்ளதாக கூறி மோசடி மற்றும் சுற்றுலா தலங்களில் ஹோட்டல் முன்பதிவு செய்வதாக கூறி பயணியரிடம் பண மோசடி போன்ற முறைகேடுகளில் ஈடுபட்ட இணையதளங்கள் மற்றும் போன் எண்கள் முடக்கப்பட்டுள்ளன. இவ்வாறு அவர் கூறினார்.