ஹாங்காங் தீ விபத்தில் பலி 128 ஆனது

ஹாங்காங்: ஹாங்காங்கில், அடுக்குமாடி குடியிருப்பு வளாகத்தில் ஏற்பட்ட தீ விபத்தில் பலியானோரின் எண்ணிக்கை, 128 ஆக அதிகரித்துள்ளது. நம் அண்டை நாடான சீனாவின் கட்டுப்பாட்டில் உள்ள ஹாங்காங்கின், தை போ மாகாணத்தில், வாங் புக் கோர்ட் என்ற மிகப்பெரிய குடியிருப்பு வளாகம் உள்ளது. தலா 35 மாடிகளுடன் எட்டு கட்டடங்களை கொண்ட இந்த வளாகம், 1980ல் கட்டப்பட்டது. சமீபத்தில், அந்த கட்டடங்களில் தனியார் கட்டுமான நிறுவனம் சார்பில் புனரமைப்பு பணிகள் நடந்த நிலையில், கடந்த 26ல், திடீரென தீ விபத்து ஏற்பட்டது. இந்த தீ அருகே உள்ள கட்டடங்களுக்கும் மளமளவென பரவியது. இந்த தீ விபத்தில், 83 பேர் உயிரிழந்ததாக முதலில் அறிவிக்கப் பட்ட நிலையில், தற்போது பலி எண்ணிக்கை 128 ஆக உயர்ந்துள்ளது. கட்டுமான நிறுவனத்தின் அலட்சியத்தால் விபத்து நடந்ததாகக் கூறப்படும் நிலையில், அந்நிறுவனத்தின் இயக்குநர், பொறியியல் ஆலோசகர் என மூவர் கைது செய்யப்பட்டனர்.