மும்பை காற்றின் தரம் மோசமானதற்கு எத்தியோப்பிய எரிமலை வெடிப்பு காரணமா? மஹா., அரசுக்கு ஐகோர்ட் கண்டனம்

மும்பை: 'மும்பையில், நவம்பர் மாதம் முழுதும் காற்றின் தரம் மிக மோசமான நிலையை எட்டியதற்கு, எத்தியோப்பிய எரிமலை வெடிப்பை காரணமாக கூறுவதை ஏற்க முடியாது' என, மஹாராஷ்டிர அரசுக்கு உயர் நீதிமன்றம் கண்டனம் தெரிவித்துள்ளது. நம் நாட்டின் பல்வேறு நகரங்களில் காற்று மாசு முக்கிய பிரச்னையாக உள்ளது. தலைநகர் டில்லியில், நவம்பர் முதல் பிப்ரவரி வரையிலான குளிர்காலத்தில் நிலைமை மிக மோசமாக மாறுகிறது. இந்நிலையில், மஹாராஷ்டிரா மாநிலம் மும்பையிலும் நவம்பர் முழுதும் காற்றின் தரம் மோசமான நிலையிலேயே நீடித்தது. அந்தேரி, பாந்த்ரா, நவி மும்பை, செம்பூர், வோர்லி உள்ளிட்ட பல பகுதிகளில் காற்றின் தரம் மோசமடைந்தது. இது தொடர்பாக தாமாக முன்வந்து வழக்குப்பதிவு செய்த மும்பை உயர் நீதிமன்ற தலைமை நீதிபதி ஸ்ரீ சந்திரசேகர், இதை விசாரணைக்கு எடுத்துக் கொண்டார். அரசு தரப்பில் ஆஜரான வழக்கறிஞர், 'கிழக்கு ஆப்ரிக்க நாடான எத்தியோப்பியாவில் எரிமலை வெடிப்பால் உருவான சாம்பல், காற்றில் மும்பை நோக்கி நகர்ந்ததால் மாசு அதிகரித்திருக்கலாம்' என கூறினார். இதைக்கேட்டு அதிருப்தியடைந்த நீதிபதி சந்திரசேகர் கூறியதாவது: எத்தியோப்பியாவில் எரிமலை வெடித்தது இரண்டு நாட்களுக்கு முன், ஆனால், அதற்கு முன்பே மும்பையை புகை மண்டலம் சூழ்ந்திருந்தது. 500 மீட்டர் தொலைவு கூட பார்வைக்கு புலப்படவில்லை. நடவடிக்கை காகிதத்தில் இருந்தால் மட்டும் போதாது. அதை கண்கூடாக பார்க்க விரும்புகிறோம். காற்றின் தரக்குறியீடு, 250 - 300 என்ற அளவுக்கு செல்வது சாதாரண விஷயம் இல்லை. மக்களின் ஆரோக்கியத்தை பாதிக்கும் பெரிய பிரச்னை. இவ்வாறு அவர் கூறினார். இரண்டாவது நாளாக நேற்றும் இந்த வழக்கு விசாரணைக்கு வந்தது. அப்போது மாநகராட்சி சார்பில் கட்டுமான பணிகள் நிறுத்தம், சாலை துாசுக்களை இயந்திரம் மூலம் அகற்றியது, சாலைகளில் தண்ணீர் தெளிப்பு போன்ற மாசு கட்டுப்பாட்டு நடவடிக்கைகள் எடுத்ததாக விளக்கம் அளிக்கப்பட்டது. இதையடுத்து, 'மாசு பிரச்னையை முழுமையாக ஆய்வு செய்ய ஒரு குழு அமைக்க வேண்டும், 15 நாட்களில் விரிவான அறிக்கை அளிக்க வேண்டும்' என, தலைமை நீதிபதி உத்தரவிட்டார்.