டில்லியில் இருக்கும் 11 மாவட்டங்களை 13 ஆக அதிகரிக்க திட்டம் பெயர்களும் மாறுகின்றன

புதுடில்லி: மாவட்ட எல்லையை மறுவரையறை செய்ய டில்லி அரசு திட்டமிட்டுள்ளது. இதனால், டில்லியில் உள்ள 11 மாவட்டங்கள் 13 ஆக அதிகரிக்கிறது. இதுகுறித்து, வருவாய்த் துறை மூத்த அதிகாரி ஒருவர் கூறியதாவது: டில்லியில் தற்போது, ஷாஹ்தாரா, கிழக்கு டில்லி, மேற்கு டில்லி, வடக்கு டில்லி, தெற்கு டில்லி, தென்கிழக்கு டில்லி, புதுடில்லி, வடமேற்கு டில்லி, மத்திய டில்லி, வடகிழக்கு டில்லி மற்றும் தென்மேற்கு டில்லி என 11 மாவட்டங்கள் உள்ளன. இந்த மாவட்டங்களின் எல்லையை நிர்வாக வசதிக்காக மறுவரையறை செய்வதோடு சிவில் லைன்ஸ், கரோல் பாக், ரோஹிணி, நரேலா, நஜப்கர், சிட்டி சதர், கேசவபுரம், வடக்கு ஷாஹ்தாரா, தெற்கு ஷாஹ்தாரா, மத்திய டில்லி, புதுடில்லி, தெற்கு டில்லி மற்றும் மேற்கு டில்லி என 13 மாவட்டங்களாக அதிகரிக்கவும், பெயர்களை மாற்றவும் வரைவுத் திட்ட அறிக்கை பரிந்துரை செய்யப்பட்டுள்ளது. மாவட்டங்களின் பெயர்களை மாற்றுவதற்கான திட்டம், நகராட்சி மண்டலங்களின் அதிகார வரம்பு மற்றும் மாவட்ட எல்லையை மாற்றியமைப்பதற்கான கொள்கை முடிவை அரசு அறிவிக்கும். இந்த சீரமைப்புத் திட்டத்தில், அதிக மக்கள் தொகை கொண்ட வடகிழக்கு மற்றும் கிழக்கு டில்லி மாவட்டங்களை, வடக்கு ஷாஹ்தாரா மற்றும் தெற்கு ஷாஹ்தாரா என மாற்றியமைக்க முடிவு செய்யப்பட்டுள்ளது. புதுடில்லி மாவட்டத்தில், லுடியன்ஸ் டில்லியில் உள்ள டில்லி கண்டோன்மென்ட், வசந்த் விஹார், சாணக்யபுரி ஆகிய பகுதிகளை டில்லி கன்டோன்மென்ட் மற்றும் புதுடில்லி துணைப் பிரிவுகளில் மீண்டும் ஒருங்கிணைக்க பரிந்துரை செய்யப்பட்டுள்ளது. அதேபோல, வசந்த் விஹாரில் உள்ள துணைப் பிரிவுகளை நஜப்கர் மாவட்டத்தில் இணைக்கவும் வரைவுத் திட்டத்தில் முன்மொழியப்பட்டுள்ளது. வருவாய்த் துறையின் இந்த வரைவுத் திட்டத்தை, டில்லி அமைச்சரவை பரிசீலனை செய்து, அனுமதி அளித்த பின், துணைநிலை கவர்னர் ஒப்புதலுக்கு அனுப்பி வைக்கப்படும். இவ்வாறு அவர் கூறினார்.