பார்வையற்ற மகளிர் கிரிக்கெட் அணியின் உலக கோப்பை வெற்றி மற்றவர்களையும் ஊக்குவிக்கும்: ஜனாதிபதி முர்மு பாராட்டு

புதுடில்லி: பார்வையற்ற இந்திய மகளிர் கிரிக்கெட் அணியினரின் வெற்றி மற்றவர்கள் தங்கள் வாழ்க்கையிலும் புதிய உயரங்களை எட்ட ஊக்குவிக்கும் என்று ஜனாதிபதி திரவுபதி முர்மு கூறி உள்ளார்.பார்வையற்றோர் சர்வதேச டி 20 உலக கோப்பை கிரிக்கெட் இறுதி போட்டியில், நேபாளத்தை வீழ்த்தி இந்திய மகளிர் அணி சாம்பியன் ஆனது. வெற்றி பெற்ற இந்திய மகளிர் அணிக்கு வாழ்த்துகள் குவிந்து வருகின்றன.இந் நிலையில், சாம்பியன் ஆன இந்திய மகளிர் அணியினர் புதுடில்லியில் ஜனாதிபதி திரவுபதி முர்முவை சந்தித்தனர். அவர்களை முர்மு வாழ்த்தினார். இது குறித்து ராஷ்டிரபதி அலுவலகம் வெளியிட்டு உள்ள செய்திக் குறிப்பில் கூறப்பட்டு உள்ளதாவது; பார்வையற்ற மகளிர் டி20 உலக கோப்பையை வென்ற இந்திய கிரிக்கெட் அணியினர், ஜனாதிபதி திரவுபதி முர்முவை ராஷ்டிரபதி பவனில் சந்தித்தனர். அவரிடம் கையெழுத்திட்ட கிரிக்கெட் மட்டையை மகளிர் அணியினர் வழங்கினர். டி20 உலக கோப்பையை வென்றதற்காக வீராங்கனைகளை ஜனாதிபதி வாழ்த்தினார். மேலும் அவர்களின் வெற்றி மற்றவர்கள் தங்கள் வாழ்க்கையிலும் புதிய உயரங்களை எட்ட ஊக்குவிக்கும் என்றும் கூறினார். இந்த நிகழ்வில் மகளிர் அணியினர் வழங்கிய கிரிக்கெட் பந்திலும் ஜனாதிபதி கையெழுத்திட்டார்.இவ்வாறு அந்த செய்திக்குறிப்பில் கூறப்பட்டு உள்ளது.