ராகுல், பிரியங்காவுக்கு அரசியல் அறிவு...கிடையாது! சோனியா உதவியாளர் மகன் கொதிப்பு

புதுடில்லி : ''காங்கிரஸ் தலைவர்கள் ராகுல், பிரியங்கா ஆகியோருக்கு அரசியல் அறிவே இல்லை. பீஹார் சட்டசபை தேர்தலில் படுதோல்வி அடைந்ததற்கு அவர்கள் தான் காரணம். கட்சியை விட்டு தயவு செய்து அவர்கள் ஒதுங்க வேண்டும்,'' என, காங்., பார்லிமென்ட் குழு தலைவர் சோனியாவின், 'வலது கை'யாக பல ஆண்டு காலம் இருந்தவரான மறைந்த அகமது படேலின் மகன் பைசல் படேல் வெளிப்படையாக விமர்சித்துள்ளார்.

மறைமுக விமர்சனம்

பீஹாரில் நடந்து முடிந்த சட்டசபை தேர்தலில், மொத்தமுள்ள 243 தொகுதிகளில், பா.ஜ., தலைமையிலான தே.ஜ., கூட்டணி, 202ஐ கைப்பற்றி ஆட்சியை தக்க வைத்தது.காங்., - ராஷ்ட்ரீய ஜனதா தளம் அடங்கிய 'மஹாகட்பந்தன்' கூட்டணி, 34 இடங்களையே கைப்பற்றி எதிர்க்கட்சி அந்தஸ்து கூட பெறவில்லை. விமர்சனம் போட்டியிட்ட 61 தொகுதிகளில், ஆறு தொகுதிகளில் மட்டுமே காங்., வென்றது. இந்த தேர்தல் தோல்விக்கு காங்., தான் காரணம் என, 'இண்டி' கூட்டணி கட்சிகளே குற்றஞ்சாட்டி வருகின்றன. மேலும், காங்., நிர்வாகிகள் சிலரும் கட்சி மேலிடத்தை மறைமுகமாகவும், நேரடியாகவும் விமர்சித்து வருகின்றனர். குஜராத்தின் பரூச் தொகுதி எம்.பி.,யாக, காங்., சார்பில் மூன்று முறை போட்டியிட்டு வென்றவர் அகமது படேல்; ஐந்து முறை ராஜ்யசபா எம்.பி.,யாகவும் பதவி வகித்தவர். காங்கிரசில் செல்வாக்குமிக்க தலைவராக விளங்கிய அகமது படேல், சோனியாவின் அரசியல் ஆலோசகராகவும், அவரது 'வலது கை'யாகவும் பல ஆண்டு காலம் இருந்தார். சோனியா குடும்பத்துக்கு மிக நெருக்கமானவராக இருந்த அகமது படேல், 2020ல் கொரோனா தொற்றால் உயிரிழந்தார். கடந்த லோக்சபா தேர்தலில், பரூச் தொகுதியை ஆம் ஆத்மிக்கு காங்., விட்டுக் கொடுத்தது. இதனால், அகமது படேலின் மகன் பைசல், மகள் மும்தாஜ் அதிருப்தி அடைந்தனர். இத்தொகுதியில் பா.ஜ.,விடம் ஆம் ஆத்மி தோற்றது. லோக்சபா தேர்தலுக்கு பின், 'காங்கிரசுக்கு வேலை செய்ய மாட்டேன்' என கூறிய பைசல் படேல், 'காங்கிரசில் தான் இருக்கிறேன்; கட்சியை விட்டு விலகவில்லை' என, கடந்த ஆகஸ்டில் விளக்கம் அளித்தார். அதே சமயம், பாகிஸ்தானுக்கு எதிராக, 'ஆப்ப ரேஷன் சிந்துார்' நடவடிக்கையை எடுத்ததற்காக பிரதமர் நரேந்திர மோடியையும் அவர் புகழ்ந்து தள்ளினார். இந்நிலையில், மறைந்த அகமது படேலின் மகன் பைசல், ஆங்கில செய்தி சேனல் ஒன்றிற்கு நேற்று அளித்த பேட்டி:

கட்சியை விட்டு ஒதுங்க வேண்டும்.

ராகுல், பிரியங்கா ஆகியோருக்கு அரசியல் அறிவே இல்லை. பீஹார் சட்டசபை தேர்தலில் படுதோல்வி அடைந்ததற்கு அவர்கள் தான் காரணம். தொடர்ச்சியாக தேர்தல்களில் தோல்விகளை தழுவி வரும் அவர்கள் திறமையற்றவர்கள்; கட்சியை விட்டு தயவு செய்து அவர்கள் ஒதுங்க வேண்டும். ராகுல், பிரியங்காவை விட, 25 மடங்கு தகுதியான மற்றும் திறமையான நபர்கள் காங்கிரசில் இருக்கின்றனர். சசி தரூர் போன்றோரிடம் கட்சியை ஒப்படைக்க வேண்டிய நேரமிது. சோனியா குடும்பத்தினர் ஒதுங்கி செல்ல வேண்டும். அக்குடும்பத்தினர் எதிர்க்கட்சிக்கு, குறிப்பாக மாற்று தலைமை தேவைப்படும் ஜனநாயகத்திற்கு கெடுதல் விளைவிக்கின்றனர். இவ்வாறு அவர் கூறினார். கடந்த 2014ல், மத்தியில் பா.ஜ., ஆட்சிக்கு வந்ததில் இருந்து ஒருசில மாநிலங்களை தவிர, பெரும்பாலான மாநிலங்களில் நடந்த சட்டசபை தேர்தல்களில், காங்., படுதோல்வி அடைந்தது. பா.ஜ.,வின் வளர்ச்சி ஏறுமுகமாக உள்ள நிலையில், காங்கிரசின் நிலைமை படுமோசமாக இருக்கிறது .

அதிருப்தி குரல்கள்

அதிருப்தி குரல்கள் பீஹார் சட்டசபை தேர்தல் தோல்விக்கு பின், தேசிய அளவில் தி.மு.க., - காங்., - சமாஜ்வாதி உள்ளிட்ட எதிர்க்கட்சிகள் அங்கம் வகிக்கும் 'இண்டி' கூட்டணியிலும், காங்கிரசுக்கு எதிராக அதிருப்தி குரல்கள் அதிகரித்துள்ளன. கூட்டணியின் தலைமை பொறுப்பை வகிக்க காங்கிரசுக்கு தகுதியில்லை என, திரிணமுல் காங்., உள்ளிட்ட கட்சிகள் வெளிப்படையாக குரல் கொடுத்து வருகின்றன. இதனால், என்ன செய்வதென்று தெரியாமல் காங்., மேலிடம் அல்லல்பட்டு வருகிறது.