ரூ.20 கோடி கடன் மோசடி: சொகுசு கார்கள் பறிமுதல்

மும்பை: மஹாராஷ்டிராவில் 'ஸ்டேட் பாங்க் ஆப் இந்தியா' வங்கிக் கிளை வழங்கிய, 20 கோடி ரூபாய் வாகனக் கடனில் மோசடி நடந்ததாக எழுந்த குற்றச்சாட்டில், ஈ.டி., எனப்படும் அமலாக்கத் துறையினர் நடத்திய சோதனையில், பல சொகுசு கார்கள் பறிமுதல் செய்யப்பட்டன. மஹாராஷ்டிர மாநிலம் புனேயில், ஸ்டேட் பாங்க் ஆப் இந்தியா வங்கியின் கிளை இயங்கி வருகிறது. இங்கு, 2017 - 19 காலக்கட்டத்தில் தலைமை மே லாளராக பணியாற்றியவர் அமர் குல்கர்னி. அந்தக் காலகட்டத்தில், சில வாடிக்கையாளர்களுக்கு போலி ஆவணங்கள் மூலமாக 'பி.எம்.டபிள்யூ., மெர்சிடிஸ் பென்ஸ்' போன்ற விலை உயர்ந்த சொகுசு கார்கள் வாங்க 20 கோடி ரூபாய்க்கு கடன் வழங்கப்பட்டதாக புகார் எழுந்தது. தன் அதிகாரத்தை துஷ்பிரயோகம் செய்து, அக்கிளையில் வாகன கடன் ஆலோசகராக பணியாற்றிய ஆதித்யா சேத்தியாவுடன் இணைந்து, இந்த மோசடியில் அமல் குல்கர்னி ஈடுபட்டது தெரியவந்தது. ஆவணங்களை சரிபார்க்காமல் முறையற்ற நபர்களுக்கு, கடன் வழங்கப்பட்டது; கேட்டதைவிட அதிக கடன் வழங்கியதும் தெரியவந்துள்ளது. இது தொடர்பாக புனே போலீசார் மற்றும் லஞ்ச ஒழிப்புத் துறையினர் வழக்குப்பதிவு செய்து விசாரணை நடத்தி வந்தனர். அமலாக்கத் துறை சார்பிலும் தனியாக பணமோசடி தடுப்புச் சட்டத்தின் கீழ் வழக்குப்பதிவு செய்யப்பட்டது. இந்நிலையி ல் வாகனக் கடன் பெற்ற நபர்கள், கார் டீலர்கள் என 12 இடங்களில், அமலாக்கத் துறை அதிகாரிகள் கடந்த இரண்டு நாட்களாக சோதனை நடத்தினர். இந்தச் சோதனையில் வாகன கடன் மோசடி தொடர்பான முக்கிய ஆவணங்கள், பல்வேறு அசையா சொத்துக்களின் பத்திரங்கள் உள்ளிட்டவற்றை கைப்பற்றியதுடன், அவர்கள் பயன்படுத்திய விலை உயர்ந்த சொகுசு கார்களையும் அதிகாரிகள் பறிமுதல் செய்தனர்.