வந்தே மாதரம் பாடலுக்கு சிறப்பு: பார்லி., கூட்டத்தொடரில் ஒரு நாள் விவாதம்

'வந்தே மாதரம்' பாடல் இயற்றப்பட்டு, 150 ஆண்டுகள் நிறைவடைந்ததை முன்னிட்டு, பார்லிமென்ட் குளிர்கால கூட்டத்தொடரில் ஒரு நாள் முழுக்க, இரு சபைகளிலும் சிறப்பு விவாதம் நடத்த மத்திய அரசு முடிவு செய்துள்ளது. மேற்கு வங்கத்தைச் சேர்ந்த கவிஞர் பங்கிம் சந்திர சட்டர்ஜியால் இயற்றப்பட்ட, 'வந்தே மாதரம்' தேச பக்திப் பாடல், முதல் முதலாக 1875 நவம்பர் 7ம் தேதி, 'பங்காதர்ஷன்' என்ற இலக்கிய இதழில் வெளியானது. பின்னர், பங்கிம் சந்திர சட்டர்ஜி எழுதிய, 'ஆனந்த மடம்' என்ற நாவலில், 1882-ல் இடம் பெற்றது. இந்தப் பாடலுக்கு, வங்கக் கவிஞர் ரவீந்திரநாத் தாகூர் இசையமைத்தார். சுதந்திர போராட்ட வீரர்களுக்கு இந்த பாடல் புதிய உத்வேகத்தை அளித்தது. மக்களால் போற்றப்படும் இந்தப் பாடல் இயற்றப்பட்டு, 150 ஆண்டுகள் நிறைவடைந்துள்ளது. அதை நினைவுகூரும் விதமாக, பல்வேறு கொண்டாட்ட நிகழ்ச்சிகளை, மத்திய அரசு நடத்தி வருகிறது. ஒராண்டுக்கு தொடர உள்ள இந்த கொண்டாட்டங்களை கடந்த மாதம் 7ம் தேதி பிரதமர் மோடி துவக்கி வைத்தார். இந்நிலையில், வரும் 1ம் தேதி துவங்கவுள்ள பார்லி குளிர்கால கூட்டத்தொடரில், 'வந்தே மாதரம்' பாடலுக்கு சிறப்பு செய்ய மத்திய அரசு முடிவு செய்துள்ளது. அதன்படி, பார்லியின் இரு சபைகளிலும் ஒருநாள் முழுதும், 'வந்தே மாதரம்' பாடல் குறித்து சிறப்பு விவாதம் நடத்தப்பட உள்ளது. கூட்டத்தொடரின் முதல் ஓரிரு தினங்களும் அமளியாகத்தான் இருக்கும் என்பதால், அதை முறியடிக்கும் விதமாக, அதே நாட்களில், 'வந்தே மாதரம்' குறித்த சிறப்பு விவாதம் நடத்தப்படலாம் என, எதிர்பார்க்கப்படுகிறது. இது, தேசபக்தி சார்ந்த விவகாரம் என்பதால், எதிர்க்கட்சிகள் தங்களது ஆவேசத்தையும், எதிர்ப்பையும் கைவிட்டாக வேண்டும். மாறாக ரகளையில் இறங்கினால், தேசப்பக்தி பாடலுக்கான சிறப்பு சேர்க்க தவறுகின்றனர் என்ற குற்றச்சாட்டை எதிர்கொள்ள நேரிடும். இதனால், குளிர்கால கூட்டத்தொடர் குறித்த எதிர்பார்ப்பு, அரசியல் வட்டாரங்களில் மேலும் அதிகரித்துள்ளது. - நமது டில்லி நிருபர் -