டில்லி குண்டு வெடிப்பு: கைதான பெண் பயங்கரவாதி அறையில் சிக்கியது ரூ.18 லட்சம்; என்ஐஏ விசாரணையில் திடுக்

புதுடில்லி: டில்லியில் குண்டுவெடிப்பு நிகழ்த்திய உமர் தோழி ஷாஹீன் சயீத் அறையில் இருந்து ரூ.18 லட்சம் பணத்தை என்ஐஏ அதிகாரிகள் கைப்பற்றியுள்ளனர்.டில்லி செங்கோட்டை அருகே உள்ள சிக்னலில், நவம்பர் 10ம் தேதி உமர் நபி என்ற பயங்கரவாதி நடத்திய தற்கொலை படை தாக்குதலில் 15 பேர் கொல்லப்பட்டனர். அதே நாளில் காலையில், ஹரியானாவின் பரிதாபாதில், 3,000 கிலோ வெடி பொருட்களுடன், அங்கு செயல்படும் அல் பலாஹ் பல்கலையைச் சேர்ந்த டாக்டர்கள் முஸாம்மில் கனி, அவரது தோழி ஷாஹீன் சயீத் கைதான நிலையில், இந்த சம்பவம் அரங்கேறியது.விசாரணையில், உயிரிழந்த உமர் நபி கைதான டாக்டர் முஸாம்மிலின் நெருங்கிய கூட்டாளி என்பது தெரிய வந்தது. நாட்டையே உலுக்கிய இந்த பயங்கரவாத தாக்குதல் குறித்து, என்.ஐ.ஏ., எனப்படும் தேசிய புலனாய்வு அமைப்பு அதிகாரிகள் விசாரித்து வருகின்றனர். இந்த வழக்கில், சதிகாரர்கள் 7 பேரை என்ஐஏ அதிகாரிகள் கைது செய்து உள்ளனர்.இந்நிலையில், அல் பலாஹ் பல்கலையில் பயங்கரவாதி உமர் நபியின் தோழி ஷாஹீன் சயீத்தை என்ஐஏ அதிகாரிகள் அழைத்து சென்று விசாரணை நடத்தினர். அப்போது அவரது அறை எண் 32ல் ரூ.18 லட்சம் பணத்தை என்ஐஏ அதிகாரிகள் கண்டுபிடித்தனர். என்ஐஏ அதிகாரிகள் பணத்தைக் கைப்பற்றினர்.இந்தப் பணம் பயங்கரவாத செயலுக்காக நிதியளிப்பதற்காக ஒதுக்கப்பட்டிருக்கலாம் என்ற சந்தேகத்தை அதிகரித்துள்ளது. இது தொடர்பாக தீவிர விசாரணை நடந்து வருகிறது.