கூட்டு நடவடிக்கையே வெற்றியின் தாரக மந்திரம்; முப்படை தளபதி அனில் சவுகான்

திருவனந்தபுரம்: ஒருங்கிணைந்த கூட்டு நடவடிக்கையே வெற்றியின் தாரக மந்திரம் என்று முப்படை தளபதி அனில் சவுகான் தெரிவித்துள்ளார். கேரள மாநிலம் எழிமலையில் உள்ள இந்திய கடற்படை அகாடமியில் பயிற்சியை முடித்த வீரர்களின் வழியனுப்பு விழாவில் முப்படை தளபதி அனில் சவுகான் கலந்து கொண்டார். அப்போது, வீரர்களின் அணிவகுப்பை அவர் ஏற்றுக்கொண்டார். தொடர்ந்து, நிகழ்ச்சியில் அவர் பேசியதாவது; போர்க்களத்தில் சிறப்பாக செயல்படாமல் போனால் நாம் அதிக உயிர்களை இழக்க நேரிடும். எனவே, சிறப்பாக செயல்பட வேண்டியது அவசியம். இது ஒரு கடமை. உங்கள் பணியில் முழு அர்ப்பணிப்பு இருக்க வேண்டும். இதனால் போரில் நீங்கள் வெற்றி பெற முடியும். நான் ராணுவத்தில் இணையும் போது, ராணுவ உத்திகள் புவியியல் அமைப்பின் அடிப்படையில் வகுக்கப்பட்டன. ஆனால், இன்று புவியியல் அமைப்பை தொழில்நுட்பங்கள் மிஞ்சி விட்டன. ராணுவ உத்திகள், திட்டமிடுதல், ராஜதந்திரங்களை தொழில்நுட்பங்களே தீர்மானிக்கின்றன. எனவே, உங்கள் வாழ்க்கை முழுவதும் அதில் கவனம் செலுத்த வேண்டும் என்று நான் விரும்புகிறேன். மேலும், போர் என்பது பல களங்களாக மாறிவிட்டன. எந்தவொரு தனிப்படையாலும் போரை வெல்ல முடியாது. வரும் காலங்களில் போர்கள் ஒருங்கிணைந்த முறையில் நடத்தப்படும். ஒருங்கிணைந்த கூட்டு நடவடிக்கையே வெற்றியின் தாரக மந்திரமாகும். எனவே, மூன்று படைகளையும் ஒருங்கிணைத்து கூட்டு நடவடிக்கையை மேற்கொள்வதற்கான செயல்களை செய்து வருகிறோம். மீண்டும் மீண்டும் சொல்கிறேன், இந்தியா ஒரு கண்டம் மற்றும் கடல் சக்தி கொண்ட நாடு. இந்திய கடற்படை தேசிய நலன்களைப் பாதுகாப்பதில் முக்கிய பங்கு வகிக்கும், இவ்வாறு அவர் கூறினார்.