சென்னை: தமிழக கனிம வளங்களை சுரண்ட, கேரள கம்யூனிஸ்ட் அரசுடன் இணைந்து, தி.மு.க., அரசு கூட்டு சதி செய்வதாக, அ.தி.மு.க., குற்றஞ்சாட்டியுள்ளது. இது தொடர்பாக, அ.தி.மு.க., வெளியிட்டுள்ள அறிக்கை:
கேரளத்தைச் சேர்ந்த, 'கேரளா மினரல்ஸ் அன்டு மெட்டல்ஸ்' நிறுவனம், துாத்துக்குடி, நெல்லை பகுதியில், 185 ஏக்கர் பட்டா நிலத்தில், கடற்கரை மணல் சார்ந்த கனிமங்களை தோண்டி எடுக்க இருப்பதாகவும், இது தொடர்பாக, தி.மு.க., அரசுடன் பேச்சு நடந்து வருவதாகவும் கூறப்படுகிறது. இத்திட்டத்திற்காக, கேரள நிறுவன அதிகாரிகள், தமிழக நிலங்களில் சோதனை நடத்தி, முன்மொழிவு சமர்ப்பித்துள்ளதாக தகவல் வருகிறது. இதற்கு, தி.மு.க., அரசு எப்படி அனுமதித்தது? சமீபத்தில், தமிழக தொழில் துறை அமைச்சர் ராஜா, கேரள அமைச்சரை சந்தித்து, 'கடவுளின் சொந்த கூட்டணி' என பதிவிட்டு, பல்வேறு திட்டங்கள் வர உள்ளதாக தெரிவித்திருந்தார். அதில் முக்கியமான திட்டமாக, இந்த கனிம வளச் சுரண்டல் திட்டமும் உள்ளதாக கூறப்படுகிறது. தமிழகத்தின் வளங்களை அண்டை மாநிலங்களைச் சுரண்ட விடுவது தான், 'கடவுளின் சொந்த கூட்டணியா' என்பதை, முதல்வர் ஸ்டாலின் தெரிவிக்க வேண்டும். கேரளத்தில் இருந்து தமிழகத்திற்கு கழிவுகளும், தமிழகத்தில் இருந்து கேரளத்திற்கு கனிமங்களும் செல்வது தான், 'கடவுளின் சொந்த கூட்டணியா?' ஏற்கனவே இப்படி தான், அரிட்டாபட்டியில் டங்ஸ்டன் சுரங்கம் தோண்டி எடுக்கத் துடித்து, பல்வேறு நாடகங்களை அரங்கேற்றி னீர்கள். சட்டசபையில் அ.தி.மு.க., பொதுச்செயலர் பழனிசாமி, மக்களின் குரலாக கர்ஜித்து, மக்கள் மிகப்பெரிய போராட்டம் நடத்தியதால், அத்திட்டம் கைவிடப்பட்டது. மேகதாது அணை விவகாரத்தில், கர்நாடக காங்கிரஸ் முதல்வர், துணை முதல்வர் ஆகியோரின் தொடர் பேச்சுகளுக்கும், செயல்பாடுகளுக்கும் எந்த எதிர்ப்பும் தெரிவிக்காமல் மவுன நாடகம் நடத்தி, தமிழகத்தின் ஜீவாதார காவிரி உரிமை பறிபோகும் பதற்றத்தை, தி.மு.க., அரசு உருவாக்கியுள்ளது. அதேபோல, இப்போது கனிம வளங்களைச் சுரண்ட, மறைமுகமாக ஒரு சதி திட்டத்தை தி.மு.க., - கம்யூனிஸ்ட் கூட்டணி, தீட்டுகிறதா என்ற சந்தேகம் எழுந்துள்ளது. தமிழகத்தின் வளங்களை மற்ற மாநிலங்களுக்கு கூறு போட்டுத் தாரை வார்க்கத் துடிப்பது வரலாற்று துரோகம். இவ்வாறு அதில் கூறப்பட்டுள்ளது.
சீமான் எங்கே??
23 hour(s) ago | 5
28-Nov-2025 | 7
27-Nov-2025 | 19