த.வெ.க.,வில் மாஜிக்கள் பலர் இணைவர் செங்கோட்டையன் நம்பிக்கை

சென்னை: ''த.வெ.க.,வில் மேலும் பல முன்னாள் அமைச்சர்கள் இணைவர்,'' என செங்கோட்டையன் தெரிவித்தார். முன்னாள் அமைச்சர் செங்கோட்டையன் த.வெ.க.,வில் இணைந்த பின், நேற்று தன் சொந்த ஊரான ஈரோடு மாவட்டம் கோபிக்கு சென்றார். https://static.vidgyor.com/player/vod/html/indexv2.html?videoId=o48flm4u&cmsAccountId=6253e2117f4d5c0009c78ed4&masterProfileId=64f573f4fbdd700008119b10&pip=1&autoplay=0

சென்னையில் இருந்து அவர் புறப்பட்டபோது அளித்த பேட்டி:

தமிழகத்தை, ஒரு புதிய கட்சி ஆள வேண்டும் என்ற எண்ணம் மக்களிடம் உள்ளது. தமிழகத்தில் ஆட்சி மாற்றத்தை உருவாக்கி, விஜய் தலைமையில் தமிழகம் வெற்றி நடைபோட அயராது உழைப்பேன். விஜயுடன் கலந்து பேசி, அவரது பிரசார பயண திட்டம் முடிவு செய்யப்படும். அ.தி.மு.க.,வை எம்.ஜி.ஆர்., துவங்கியபோது, திரைப்படம் போல 100 நாட்கள் தான் ஓடும் என்றனர். ஆனால், இறுதி வரை எம்.ஜி.ஆரை யாராலும் வெல்ல முடியவில்லை. அ.தி.மு.க.,வில் இருந்து முக்கிய தலைவர்கள், வேறு யாரெல்லாம் த.வெ.க.,வில் இணைகின்றனர் என்பதை இப்போது சொன்னால் பெரிய பிரச்னை வரும். இவ்வாறு அவர் கூறினார்.வரவேற்பு இதையடுத்து, கோவை சென்ற அவருக்கு விமான நிலையத்தில் த.வெ.க.,வினர் வரவேற்பு அளித்தனர்.

அங்கு பேட்டியளித்த செங்கோட்டையன் கூறியதாவது:

ஆண்டிற்கு 500 கோடி ரூபாய் வருவாயை துாக்கி எறிந்து விட்டு, மக்களுக்கு நேர்மையான ஆட்சியை தர விஜய் வந்திருக்கிறார். எல்லாருக்கும் வீடு, இரு சக்கர வாகனம் என மனிதநேயத்தோடு அறிவித்திருக்கிறார். முதல் தலைமுறையில் எம்.ஜி.ஆர்., வழியிலும், இரண்டாவது தலைமுறையில் ஜெயலலிதா வழியிலும் பணியாற்றினோம். மூன்றாவது தலைமுறையாக, விஜயை ஆட்சி கட்டிலில் அமர்த்த உறுதுணையாக இருப்போம். இவ்வாறு அவர் கூறினார். அதன்பிறகு, தன் சொந்த தொகுதியான கோபிசெட்டிபாளையத்துக்கு செங்கோட்டையன் சென்றார். அங்கு, அவருக்கு த.வெ.க.,வினர் வரவேற்பு அளித்தனர்.

அப்போது, அவர் பேசியதாவது:

அ.தி.மு.க., பொதுச்செயலர் பழனிசாமி முதல்வரான பின், எந்த தேர்தலிலும் அக்கட்சி வெற்றி பெறவில்லை. வழிகாட்டி பொதுச்செயலராகவும், முதல்வராகவும் பழனிசாமியை நான் தான் முன்மொழிந்தேன். எனக்கு வந்த வாய்ப்பை கூட, அவருக்கு விட்டுக் கொடுத்தேன். ஆனால், சாதாரண தொண்டராக கூட இருக்கக்கூடாது என, என்னை பழனிசாமி நீக்கினார். இவரெல்லாம் ஆட்சிக்கு வந்தால் என்னவாகும் என்பதை, நீங்கள்தான் தீர்மானிக்க வேண்டும். காலம் கனிந்து கொண்டிருக்கிறது. த.வெ.க.,வில் இன்னும் பல முன்னாள் அமைச்சர்கள் வருவர். டிசம்பருக்குள் வலிமையான கூட்டணி அமையும். கடந்த 40 ஆண்டுகளாக ஜெயலலிதா படத்தை சட்டை பையில் வைத்திருந்தேன். அதை ஒரே நாளில் மாற்றினால், 'துரோகி' என கூறியிருப்பர். எந்த தலைவரின் படத்தை வைத்திருந்தாலும், அதை ஏற்றுக்கொண்டு அரவணைப்பவர் தான் விஜய். ஜெயலலிதாவுக்கு வழிகாட்டியது போல் விஜய்க்கும் வழிகாட்டியாக இருப்பேன். இவ்வாறு அவர் பேசினார்.

விமானத்தில் கோளாறு

சென்னையிலிருந்து செங்கோட்டையன் புறப்பட்ட விமானம், நேற்று மதியம் 1:00 மணிக்கு கோவை சென்றிருக்க வேண்டும். ஆனால், தொழில்நுட்ப கோளாறு காரணமாக, பெங்களூரில் விமானம் தரை இறங்கியது. அங்கு, விமானத்தில் ஏற்பட்ட கோளாறு சரி செய்யப்பட்ட பின், கோவைக்கு மாலை 4:00 மணிக்கு சென்றடைந்தது. அவரை விமான நிலையத்தில், த.வெ.க.,வினர் மேள, தாளங்களுடன் வரவேற்றனர்.