முதல்வரை விஜய் சந்திப்பாரா? த.வெ.க., சாமிநாதன் பரபரப்பு தகவல்

புதுச்சேரி: முதல்வர் ரங்கசாமியை சந்திப்பது குறித்து கட்சித் தலைவர் விஜய் தான் முடிவு செய்வார் என்று சாமிநாதன் கூறினார். நேற்று முன்தினம் விஜய் முன்னிலையில், த.வெ.க.,வில் இணைந்த முன்னாள் எம்.எல்.ஏ.,க்கள் சாமிநாதன், ஹசனா ஆகியோருக்கு, புதுச்சேரி த.வெ.க., சார்பில், காலாப்பட்டில் நேற்று வரவேற்பு அளிக்கப்பட்டது. தொடர்ந்து சித்தாந்தனந்த கோவிலில் தரிசனம் முடித்த பின், உப்பளம் அம்பேத்கர் சிலைக்கு மாலை அணிவித்து மரியாதை செலுத்தினர். தொடர்ந்து சாமிநாதன் நிருபர்களிடம் கூறியதாவது; மக்கள் சந்திப்பு ரோடு ஷோவிற்காக வரும் 5ம் தேதி புதுச்சேரி வரும் கட்சி தலைவர் விஜய், முதல்வர் ரங்கசாமியை சந்திப்பாரா என்பது அவர்தான் கூற வேண்டும். புதுச்சேரியில் இருந்து மேலும் பலர் த.வெ.க.,வில் சேர உள்ளனர். அவர்களை சேர்ப்பதற்கான நடவடிக்கை விரைவில் எடுப்போம். வரும் தேர்தலில் எந்த கட்சியுடன் கூட்டணி என்பதை கட்சி தலைமை முடிவு செய்யும். த.வெ.க.,வுடன் கூட்டணி அமைக்க பல கட்சிகள் ஆர்வம் காட்டுகின்றன. இது எந்த கட்சிக்கும் கிடைக்காத பெருமை. ரசிகர்களின் ஆர்வம் ஓட்டாக மாறுமா என்பதை வரும் தேர்தலில் அவர்கள் பார்ப்பார்கள். விஜய் வந்து சென்ற பின், புதுச்சேரிக்கு புதிய நிர்வாகிகள் அறிவிப்புகள் வெளியாகும். 'ரோடு ஷோ'விற்கு அனுமதி கேட்டு போலீசில் மனு கொடுத்துள்ளோம். அது தொடர்பாக இன்று போலீஸ் அதிகாரிகளை சந்திக்க உள்ளோம். தொடர்ந்து கட்சி நிர்வாகிகளை சந்திக்க உள்ளோம் என்றார்.