பைனலுக்கு முன்னேறியது இந்தியா: அஸ்லான் ஷா கோப்பை ஹாக்கியில்

இபோ: அஸ்லான் ஷா கோப்பை ஹாக்கி பைனலுக்கு இந்திய அணி முன்னேறியது. கடைசி லீக் போட்டியில் 14-3 என கனடாவை வென்றது.மலேசியாவின் இபோ நகரில், அஸ்லான் ஷா கோப்பை ஹாக்கி 31வது சீசன் நடக்கிறது. இந்தியா, மலேசியா, பெல்ஜியம், கனடா, நியூசிலாந்து, தென் கொரியா என 6 அணிகள் 'ரவுண்டு-ராபின்' முறையில் லீக் சுற்றில் பங்கேற்றன.லீக் போட்டியில் இந்தியா, கனடா அணிகள் மோதின. துவக்கத்தில் இருந்து ஆதிக்கம் செலுத்திய இந்தியா 14-3 என்ற கோல் கணக்கில் வெற்றி பெற்றது. இந்திய அணிக்கு ஜுக்ராஜ் சிங் 4 (12, 26, 39, 50வது நிமிடம்), ராஜீந்தர் சிங் (10, 24வது), அமித் ரோஹிதாஸ் (15, 46வது), அபிஷேக் நைன் (57, 59வது) தலா 2, நிலகண்ட சர்மா (4வது), தில்பிரீத் சிங் (25வது), தமிழகத்தின் கார்த்தி செல்வம் (43வது), சஞ்சய் ராணா (56வது) தலா ஒரு கோல் அடித்து கைகொடுத்தனர்.மற்றொரு லீக் போட்டியில் பெல்ஜியம் அணி 5-1 என்ற கோல் கணக்கில் நியூசிலாந்தை வீழ்த்தியது.லீக் சுற்றின் முடிவில் 4 வெற்றி, ஒரு தோல்வி என 12 புள்ளிகளுடன் 2வது இடம் பிடித்த இந்தியா 9வது முறையாக பைனலுக்குள் நுழைந்தது. முன்னதாக விளையாடிய 8 பைனலில், 5ல் (1985, 91, 95, 2009, 2010) கோப்பை வென்றது. மூன்றில் (2008, 2016, 2019) 2வது இடம் பிடித்தது.பைனலில் (நவ. 30) இந்திய அணி, பெல்ஜியத்தை (13 புள்ளி) எதிர்கொள்கிறது.