இந்திய அணிக்கு இரண்டாவது வெற்றி: ஜூனியர் உலகக்கோப்பை ஹாக்கியில்...

சென்னை: ஜூனியர் உலகக்கோப்பை ஹாக்கி தொடரில் இந்திய அணி தொடர்ந்து 2வது வெற்றியை பதிவு செய்தது. லீக் போட்டியில் கோல் மழை பொழிந்த இந்தியா 17-0 என, ஓமனை வென்றது.சென்னை, மதுரையில், 21 வயதுக்கு உட்பட்டோருக்கான ஜூனியர் உலகக்கோப்பை ஹாக்கி 14வது சீசன் நடக்கிறது. 'நடப்பு சாம்பியன்' ஜெர்மனி, இந்தியா, ஆஸ்திரேலியா உள்ளிட்ட 24 அணிகள், 6 பிரிவுகளாக லீக் சுற்றில் விளையாடுகின்றன.சென்னையில் உள்ள மேயர் ராதாகிருஷ்ணன் ஹாக்கி மைதானத்தில் நடந்த 'பி' பிரிவு லீக் போட்டியில் இந்தியா, ஓமன் அணிகள் மோதின. துவக்கத்தில் இருந்து ஆதிக்கம் செலுத்திய இந்திய அணிக்கு அர்ஷ்தீப் சிங் (4வது நிமிடம்), மன்மீத் சிங் (17, 26வது) 'பீல்டு' கோல் அடித்தனர். ஆட்டத்தின் 29வது நிமிடத்தில் கிடைத்த 'பெனால்டி கார்னர்' வாய்ப்பில் இந்தியாவின் அன்மோல் எக்கா ஒரு கோல் அடித்தார். இந்தியாவின் தில்ராஜ் சிங் (29வது) தன்பங்கிற்கு ஒரு 'பீல்டு' கோல் அடித்தார். முதல் பாதி முடிவில் இந்திய அணி 5-0 என முன்னிலையில் இருந்தது.இரண்டாவது பாதியிலும் இந்திய வீரர்கள் அசத்தினர். தில்ராஜ் (32, 58வது), அர்ஷ்தீப் (33, 40வது), அஜீத் யாதவ் (34, 47வது), மன்மீத் (36வது), குர்ஜோத் சிங் (39. 45வது), ஷர்தானந்த் (55வது), லுவாங் (43, 50வது) கோல் அடித்து கைகொடுத்தனர். ஆட்டநேர முடிவில் இந்திய அணி 17-0 என்ற கோல் கணக்கில் வெற்றி பெற்றது. முதல் போட்டியில் சிலியை வென்ற இந்தியா, தொடர்ச்சியாக 2வது வெற்றி பெற்றது.மற்றொரு 'பி' பிரிவு லீக் போட்டியில் சிலி, சுவிட்சர்லாந்து அணிகள் மோதின. இதில் சுவிட்சர்லாந்து அணி 3-2 என்ற கோல் கணக்கில் தொடர்ந்து 2வது வெற்றியை பதிவு செய்தது. மீண்டும் தோல்வியடைந்த சிலி அணி காலிறுதி வாய்ப்பை இழந்தது.காலிறுதி எப்படி'பி' பிரிவில் 2 போட்டியிலும் வெற்றி பெற்ற இந்தியா, சுவிட்சர்லாந்து அணிகள் தலா 6 புள்ளிகளுடன் உள்ளன. வரும் டிச. 2ல் மதுரையில் நடக்கவுள்ள கடைசி லீக் போட்டியில் இந்தியா, சுவிட்சர்லாந்து அணிகள் மோதுகின்றன. இதில் வெற்றி பெறும் அணி நேரடியாக காலிறுதிக்கு முன்னேறும். ஒருவேளை போட்டி 'டிரா' ஆனால், கோல் அடிப்படையில் காலிறுதிக்கு தகுதி பெறும் அணி முடிவாகும்.பிரான்ஸ் அபாரம்: சென்னையில் நடந்த 'எப்' பிரிவு லீக் போட்டியில் பிரான்ஸ், தென் கொரியா அணிகள் மோதின. இதில் கோல் மழை பொழிந்த பிரான்ஸ் அணி 11-1 என்ற கணக்கில் வெற்றி பெற்றது. பிரான்ஸ் வீரர் ஆர்தர் பிளாச் 'ஹாட்ரிக்' கோல் (23, 26, 42வது நிமிடம்) அடித்தார்.மற்றொரு 'எப்' பிரிவு லீக் போட்டியில் ஆஸ்திரேலியா, வங்கதேசம் அணிகள் மோதின. இதில் ஆஸ்திரேலிய அணி 5-3 என்ற கோல் கணக்கில் வெற்றி பெற்றது.ஜெர்மனி கோல் மழைமதுரை: மதுரை, ரேஸ்கோர்ஸ் சர்வதேச ஹாக்கி மைதானத்தில் நேற்று நடந்த 'ஏ' பிரிவு லீக் போட்டியில் ஜெர்மனி, கனடா அணிகள் மோதின. இதில் கோல் மழை பொழிந்த ஜெர்மனி 7-0 என்ற கணக்கில், தொடர்ந்து 2வது வெற்றியை பதிவு செய்தது. ஜெர்மனி சார்பில் பென் ஹாஸ்பாக் 'ஹாட்ரிக்' கோல் (24, 51, 52வது நிமிடம்) அடித்தார்.மற்றொரு 'ஏ' பிரிவு லீக் போட்டியில் தென் ஆப்ரிக்கா, அயர்லாந்து அணிகள் மோதின. இதில் தென் ஆப்ரிக்க அணி 2-1 என்ற கோல் கணக்கில் முதல் வெற்றியை பதிவு செய்தது.நெதர்லாந்து அசத்தல்: 'ஈ' பிரிவு லீக் போட்டியில் நெதர்லாந்து, இங்கிலாந்து அணிகள் மோதின. இதில் நெதர்லாந்து அணி 5-3 என்ற கோல் கணக்கில் வெற்றி பெற்றது.மற்றொரு 'ஈ' பிரிவு லீக் போட்டியில் மலேசியா, ஆஸ்திரியா அணிகள் மோதின. இதில் மலேசிய அணி 5-1 என்ற கோல் கணக்கில் வென்றது.