அரையிறுதியில் திவ்யான்ஷி * உலக யூத் டேபிள் டென்னிசில்...

கிளஜ் நபோகா: உலக யூத் டேபிள் டென்னிஸ் தொடர் அரையிறுதிக்கு இந்தியாவின் திவ்யான்ஷி முன்னேறினார். ருமேனியாவின் கிளஜ் நபோகா நகரில், உலக யூத் டேபிள் டென்னிஸ் சாம்பியன்ஷிப் தொடர் நடந்தது. இதில் 15 வயதுக்கு உட்பட்ட பெண்கள் பிரிவில் இந்தியா சார்பில் திவ்யான்ஷி, அனன்யா பங்கேற்கின்றனர். அனன்யா முதல் சுற்றில் தோல்வியடைந்தார். திவ்யான்ஷி காலிறுதிக்குள் நுழைந்தார்.இதில், ஜப்பாவின் கோகோமி இஷிடாவை எதிர்கொண்டார். முதல் இரு செட்டை திவ்யான்ஷி 11-9, 13-11 என கைப்பற்றினார். அடுத்த இரு செட்டை 10-12, 9-11, என இழந்தார். பின் சுதாரித்த இவர், 5, 6வது செட்டுகளை 11-9, 11-7 என வசப்படுத்தினார்.முடிவில் திவ்யான்ஷி 4-2 (11-9, 13-11, 10-12, 9-11, 11-9, 11-7) என்ற கணக்கில் வெற்றி பெற்று, அரையிறுதிக்கு முன்னேறி, குறைந்தபட்ச பதக்கத்தை உறுதி செய்தார்.