பூங்காவில் விளையாடிய சிறுமிக்கு மின்சாரம் பாய்ந்து கையில் காயம்

மறைமலை நகர், நவ. 30-- மறைமலை நகர் பூங்காவில் விளையாடிய சிறுமிக்கு, மின்சாரம் பாய்ந்து கையில் காயம் ஏற்பட்டது. மறைமலை நகர் என்.ஹெச் - 3வது தெருவைச் சேர்ந்த பூபாலன் என்பவரது குழந்தை பவித்ரா, 4. நேற்று முன்தினம் மாலை 6:30 மணியளவில், காந்தி நகர் பகுதியிலுள்ள திருவள்ளுவர் பூங்காவிற்கு, பெற்றோர் சிறுமியை அழைத்துச் சென்றனர். அங்கு சிறுமி விளையாடிய போது, பூங்காவிலுள்ள மின் கம்பத்தில் இருந்த ஒயரை தொட்டுள்ளார். அப்போது மின்சாரம் பாய்ந்து, சிறுமியின் இடது கையில் காயம் ஏற்பட்டு உள்ளது. உடனே சிறுமியை மீட்டு, மறைமலை நகர் அரசு ஆரம்ப சுகாதார நிலையத்தில் சிகிச்சை அளித்துள்ளனர். அதன் பின், சிறுமி வீட்டிற்கு அனுப்பி வைக்கப்பட்டார். சம்பவம் நடந்த இடத்தை மறைமலை நகர் மின்வாரிய அதிகாரிகள் ஆய்வு செய்து, மின் ஒயரை சரி செய்தனர். இச்சம்பவம் குறித்து, மறைமலை நகர் போலீசார் விசாரிக்கின்றனர். எச்சரித்தது 'தினமலர்' மறைமலை நகர் நகராட்சி எல்லைக்கு உட்பட்ட பகுதிகளில் உள்ள பூங்காக்களில் மின் கம்பங்கள், மின் விளக்குகள் உடைந்து, பராமரிப்பின்றி உள்ளது குறித்து, நம் நாளிதழில் செய்தி வெளியிடப்பட்டது. இருப்பினும் பல ஆண்டுகளாக இந்த பூங்காக்கள் சீரமைக்கப்படவில்லை. இந்நிலையில், இந்த பூங்காவில் சிறுமி மின்சாரம் பாய்ந்து காயமடைந்த சம்பவம் நடந்துள்ளது.