மதுராந்தகம் -- உத்திரமேரூர் சாலை பணி எச்சரிக்கை பலகை வைக்க வலியுறுத்தல்

மதுராந்தகம்: மதுராந்தகத்திலிருந்து நெல்வாய் வழியாக உத்திரமேரூர் செல்லும் மாநில நெடுஞ்சாலை விரிவாக்க பணிகள் குறித்து, எச்சரிக்கை பலகை வைக்க வேண்டுமென, வாகன ஓட்டிகள் வலியுறுத்தி உள்ளனர். மதுராந்தகத்திலிருந்து புழுதிவாக்கம், நெல்வாய் வழியாக உத்திரமேரூர் வரை செல்லும் மாநில நெடுஞ்சாலை உள்ளது. இந்த சாலையை புழுதிவாக்கம், வேடந்தாங்கல், நெல்வாய், சூரை, புதுப்பட்டு உள்ளிட்ட 30க்கும் மேற்பட்ட கிராமத்தினர் பயன்படுத்தி வருகின்றனர். இச்சாலை இருசக்கர வாகனங்கள், கனரக வாகனங்கள், தனியார் மற்றும் அரசு பேருந்துகள் என, வாகன பயன்பாடு நிறைந்த சாலை. சாலை மிகவும் குறுகியதாக இருந்ததால், விரிவாக்கம் செய்ய வேண்டுமென வாகன ஓட்டிகள், மாநில நெடுஞ்சாலை துறையினருக்கு கோரிக்கை விடுத்து வந்தனர். இது குறித்து நம் நாளிதழில் செய்தி வெளியானது. அதன்படி, மதுராந்தகம் அடுத்த கக்கிலப்பேட்டையிலிருந்து, புழுதிவாக்கம் அடுத்த நெல்வாய் கூட்டுச்சாலை வரை விரிவாக்கம் செய்யும் பணிகள் நடந்து வருகின்றன. சாலை விரிவாக்கத்திற்காக சாலை ஓரம் பள்ளம் தோண்டி மண் எடுக்கப்பட்டு, அதில் எம்.சாண்ட் மற்றும் ஜல்லி கற்கள் கலந்த கலவையை கொட்டி சமன் செய்து வருகின்றனர். ஆனால், சாலை ஓரம் தோண்டப்படும் பள்ளங்கள் குறித்து, எவ்வித எச்சரிக்கை பலகையும் வைக்கப்படவில்லை. அத்துடன், விபத்தை தடுக்கும் வகையில், அங்கு கயிறும் கட்டப்படாமல் உள்ளது. சிறிய அளவிலான கோணிப்பைகளில் மண் நிரப்பி சாலை ஓரம் வைத்துள்ளனர். இதனால், இரவு நேரங்களில் சாலையை பயன்படுத்தும் வாகன ஓட்டிகள், விபத்தில் சிக்கும் அபாயம் உள்ளது. எனவே, சாலை ஓரம் விரிவாக்க பணிகள் நடைபெறும் இடங்களில், இரவில் ஒளிரும் 'ஸ்டிக்கர்' மற்றும் இரவில் ஒளிரும் கயிறுகளை கட்ட, நெடுஞ்சாலைத் துறையினர் உரிய நடவடிக்கை எடுக்க வேண்டும் என, வாகன ஓட்டிகள் கோரிக்கை விடுத்துள்ளனர்.