மதுராந்தகம் அரசு மருத்துவமனையில் உயர்கோபுர மின்விளக்கு எரியாமல் அவதி

மதுராந்தகம்: மதுராந்தகம் அரசு பொது மருத்துவமனையில், எரியாமல் உள்ள உயர் கோபுர மின்விளக்குகளை சீரமைக்க வேண்டுமென, நோயாளிகள் வேண்டுகோள் விடுத்துள்ளனர். மதுராந்தகம் அரசு பொது மருத்துவமனையில், நாள்தோறும் புறநோயாளிகள் மற்றும் உள்நோயாளிகள் என, 1,200க்கும் மேற்பட்டோர் சிகிச்சை பெற்று வருகின்றனர். இந்த மருத்துவமனையை சித்தாமூர், சூணாம்பேடு, அச்சிறு பாக்கம், மதுராந்தகம், ராமாபுரம், வேடந்தாங்கல் உள்ளிட்ட, 150க்கும் மேற்பட்ட கிராம மக்கள் பயன் படுத்தி வருகின்றனர். மருத்துவமனையில், சில ஆண்டுகளுக்கு முன் உயர் கோபுர மின்விளக்கு பொருத்தப்பட்டது. தற்போது, அந்த மின்விளக்குகள் எரியாமல், மருத்துவமனை வளாகப் பகுதியில் இருள் சூழ்ந்து காணப் படுகிறது. இதனால், இரவு நேரங்களில் மருத்துவமனை வளாகத்தில், பாம்பு உள்ளிட்ட விஷ ஜந்துக்கள் நடமாட்டம் அதிகமாக உள்ளதாக மருத்துவமனை செவிலியர்கள் மற்றும் பணியாளர்கள், நோயாளிகள் தெரிவிக்கின்றனர். எனவே, மதுராந்தகம் அரசு பொது மருத்துவமனையில் எரியாமல் உள்ள உயர் கோபுர மின்விளக்குகளை சீரமைக்க, சுகாதாரத்துறை மற்றும் பொதுப்பணித்துறை அதிகாரிகள் உரிய நடவடிக்கை எடுக்க வேண்டும் என, நோயாளிகள் வேண்டுகோள் விடுத்துள்ளனர்.