மதுராந்தகம் ஆரம்ப சுகாதார நிலையம் மக்கள் பயன்பாட்டிற்கு திறக்க எதிர்பார்ப்பு

மதுராந்தகம்: மதுராந்தகம் நகராட்சியில், புதிதாக கட்டப்பட்ட நகர்ப்புற ஆரம்ப சுகாதார நிலையத்தை மக்கள் பயன்பாட்டிற்கு திறக்க வேண்டுமென, சமூக ஆர்வலர்கள் எதிர்பார்க்கின்றனர். செங்கல்பட்டு மாவட்டம், மதுராந்தகம் நகராட்சிக்கு உட்பட்ட பகுதியில், ஆங்கிலேயர் காலத்தில் கட்டப்பட்ட கட்டடத்தில், வட்டாட்சியர் அலுவலகம் இயங்கி வந்தது. போதிய இடவசதி இல்லாததால் மாற்று இடம் தேர்வு செய்யப்பட்டு, அய்யனார் கோவில் சந்திப்பு பகுதியில், புதிதாக வட்டாட்சியர் அலுவலகம் கட்டப்பட்டு, தற்போது செயல்பட்டு வருகிறது. இந்நிலையில், பழைய வட்டாட்சியர் அலுவலக கட்டடம் இடித்து அகற்றப்பட்ட இடத்தில், 15வது நிதி குழு மானியம் -சுகாதார திட்டத்தின் கீழ், 420 சதுர மீட்டர் பரப்பளவில், 1.20 கோடி ரூபாய் மதிப்பீட்டில், நகர்ப்புற ஆரம்ப சுகாதார நிலைய கட்டடம் கட்டுவதற்கான பணி, 2023 டிசம்பரில் துவக்கப்பட்டது. 'ஒன்பது மாதங்களுக்குள் அனைத்து பணிகளையும் முடித்து, மக்கள் பயன்பாட்டிற்கு கொண்டு வரும் வகையில் கட்டட பணிகள் விரைந்து செயல்படுத்தப்படும்' என, மதுராந்தகம் நகராட்சி அதிகாரிகள் தெரிவித்திருந்தனர். ஆனால், கட்டுமான பணிகள் மந்தமாக நடந்து வந்தன. தற்போது, கடந்த சில மாதங்களுக்கு முன், கட்டட பணிகள் முழுமையாக முடிந்துள்ளன. சுகாதார நிலையத்திற்குள் ஆம்புலன்ஸ் உள்ளிட்ட வாகனங்கள் செல்லும் வகையில், ஆக்கிரமிப்புகள் அகற்றப்பட்டு, சிமென்ட் சாலை அமைக்கப்பட்டுள்ளது. ஆனால், இந்த சுகாதார நிலையம், மக்கள் பயன்பாட்டிற்கு கொண்டுவரப்படாமல், பூட்டியே வைக்கப்பட்டு உள்ளது. கட்டட பணிகள் முடிவுற்று சுகாதாரத் துறையிடம் ஒப்படைக்கப்பட்டதாக, நகராட்சி அதிகாரிகள் தெரிவித்து உள்ளனர். ஆனாலும், பயன்பாட்டிற்கு கொண்டுவரப்படாதது, இப்பகுதி மக்களிடம் அதிருப்தியை ஏற்படுத்தி உள்ளது. எனவே, நகர்ப்புற ஆரம்ப சுகாதார நிலைய கட்டடத்தை மக்கள் பயன்பாட்டிற்கு கொண்டுவர, மாவட்ட சுகாதாரத்துறை அதிகாரிகள் உரிய நடவடிக்கை எடுக்க வேண்டும் என, சமூக ஆர்வலர்கள் எதிர்பார்க்கின்றனர். விரைவில் பயன்பாட்டிற்கு வரும் சுகாதார துறை இணை இயக்குநர் ஒருவர் கூறியதாவது: மதுராந்தகத்தில் புதிதாக கட்டப்பட்டுள்ள, நகர்ப்புற ஆரம்ப சுகாதார நிலைய பணிகள் அனைத்தும் முடிந்துள்ளன. கட்டடங்களை சுகாதார துறையிடம், நகராட்சி நிர்வாகம் ஒப்படைத்து உள்ளது. விரைவில், மக்கள் பயன்பாட்டிற்கு கொண்டுவரப்படும். அதாவது, டிசம்பர் முதல் வாரத்திற்குள் கட்டடம் திறக்கப்பட்டு, மக்கள் பயன்பாட்டிற்கு கொண்டு வரப்படும். இவ்வாறு, அவர் கூறினார்.