பூரியம்பாக்கம் பேருந்து நிறுத்தத்தில் நிழற்குடையின்றி பயணியர் தவிப்பு

சித்தாமூர்: பூரியம்பாக்கம் பேருந்து நிறுத்தத்தில் நிழற்குடை வசதி இல்லாமல், பேருந்திற்காக காத்திருக்கும் பயணியர் அவதிப் படுகின்றனர். சித்தாமூர் அருகே பூரியம்பாக்கம் கிராமத்தில், மதுராந்தகம் - வெண்ணாங்குப்பட்டு மாநில நெடுஞ்சாலையில், பேருந்து நிறுத்தம் உள்ளது. நீர்பெயர், நீலமங்கலம், பூரியம்பாக்கம் உள்ளிட்ட கிராம மக்கள் மதுராந்தகம், செங்கல்பட்டு, சென்னை, புதுச்சேரி போன்ற பகுதிகளுக்குச் செல்ல, இந்த பேருந்து நிறுத்தத்தை பயன்படுத்துகின்றனர். இப்பகுதியில் தனியார் பள்ளிகள் மற்றும் தொழிற் சாலைகள் இயங்குகின்றன. பள்ளி மாணவர்கள், வெளியூர்களுக்குச் வேலைக்குச் செல்லும் பொதுமக்கள் என, தினமும் ஏராளமானோர், இந்த பேருந்து நிறுத்தத்தை பயன்படுத்துகின்றனர். பேருந்து நிறுத்தத்தில் அரசு மற்றும் தனியார் என, 10க்கும் மேற்பட்ட பேருந்துகள் நின்று செல்லும். இந்நிலையில் இங்கு, 25 ஆண்டுகளுக்கு முன் அமைக்கப்பட்ட நிழற்குடை பராமரிப்பின்றி, இடிந்து விழும் நிலையில் உள்ளது. இதனால் பேருந்திற்காக காத்திருக்கும் பயணியர் மற்றும் பள்ளி மாணவ - மாணவியர், அமர இருக்கை வசதி இல்லாமல் கடும் அவதிப் படுகின்றனர். எனவே, ஊரக வளர்ச்சித் துறை அதிகாரிகள் ஆய்வு செய்து, பூரியம்பாக்கத்தில் பேருந்து நிறுத்த நிழற்குடை அமைக்க நடவடிக்கை எடுக்க வேண்டும் என, பயணியர் வலியுறுத்தி உள்ளனர்.