பள்ளிப்பேட்டை டாஸ்மாக் கடையை இடமாற்றம் செய்ய வேண்டுகோள்

அச்சிறுப்பாக்கம், பள்ளிப்பேட்டை பகுதியில் உள்ள டாஸ்மாக் மதுக்கடையை இடமாற்றம் செய்ய வேண்டும் என, சமூக ஆர்வலர்கள் வேண்டுகோள் விடுத்துள்ளனர். அச்சிறுப்பாக்கம் பேரூராட்சி பள்ளிப்பேட்டை பகுதியில், அரசு டாஸ்மாக் மதுக்கடை இயங்கி வருகிறது. இவ்வழியாக தினமும், பள்ளி, கல்லுாரி மாணவர்கள் மற் றும் அத்தியாவசிய பணிக்குச் செல்பவர்கள் என, 1,000க்கும் மேற்பட்டோர் சென்று வருகின்றனர். இந்நிலையில், இந்த டாஸ்மாக் கடை அருகில் உள்ள சாலையில் அமர்ந்து மது அருந்தும், 'குடி'மகன்கள், போதை தலைக்கேறியதும் அவ்வழியாகச் செல்லும் மாணவியர் மற்றும் இளம்பெண்களை கிண்டல் செய்து, வம்புக்கு இழுக்கின்றனர். இதனால், அடிக்கடி தகராறு ஏற்பட்டு வருகிறது. இதுமட்டுமின்றி, இங்குள்ள அரசு ஆரம்ப சுகாதார நிலையத்திற்குச் செல்பவர்களும், கடுமையாக பாதிக்கப்படுகின்றனர். இதை தவிர்க்க, டாஸ்மாக் கடையை வேறு இடத்திற்கு மாற்ற வேண்டும் என, டாஸ்மாக் நிர்வாக மேலாளரிடம், இப்பகுதி மக்கள் மனு அளித்தும், நடவடிக்கை இல்லாமல் கிடப்பில் போடப்பட்டு உள்ளது. பள்ளி, கல்லுாரி மாணவியர், இளம்பெண்கள் கடுமையாக பாதிக்கப்படுவதை தடுக்க, இந்த டாஸ்மாக் கடையை வேறு இடத்திற்கு மாற்ற கோரி, கலெக்டர் சினேகாவிடம் நேற்று முன்தினம், இப்பகுதி மக்கள் மனு அளித்தனர். இந்த மனு மீது நடவடிக்கை எடுக்க வேண்டும் என, சமூக ஆர்வலர்கள் வலியுறுத்தி உள்ளனர்.