பெயர் பலகைகளில் காணாமல் போன தமிழ் அரசு கிடுக்கிப்பிடி போட வலியுறுத்தல்

செங்கல்பட்டு: செங்கல்பட்டு மாவட்டத்தில் கடைகள், நிறுவனங்கள் உட்பட தனியாருக்குச் சொந்தமான வணிக தளங்கள் அனைத்திலும், ஆங்கிலத்திலேயே பெயர்ப் பலகைகள் உள்ளன. தமிழில் பெயர் பலகை வைப்பதை கட்டாயமாக்க, அரசு கிடுக்கிப்பிடி சட்டத்தை நடைமுறைப்படுத்த வேண்டும் என, தமிழ் ஆர்வலர்கள் வலியுறுத்தி உள்ளனர். செங்கல்பட்டு மாவட்டத்தில் மாநகராட்சி, நகராட்சி, பேரூராட்சி, ஊராட்சிக்கு உட்பட்ட இடங்களில், ஒரு லட்சத்திற்கும் மேற்பட்ட சில்லறை விற்பனை கடைகள் உள்ளன. தவிர, 1,000க்கும் மேற்பட்ட தனியார் பள்ளிகள், மருத்துவமனைகள், 500க்கும் மேற்பட்ட சிறு, குறு நிறுவனங்கள் செயல்படுகின்றன. இங்கு 90 சதவீத பெயர் பலகைகள், ஆங்கிலத்தில் மட்டுமே வைக்கப்பட்டுள்ளன. மீதமுள்ள 10 சதவீத பெயர் பலகைகளும், 'தங்கிலிஷ்' முறையில் எழுதப்பட்டு உள்ளன. கண்ணுக்கெட்டிய வரை, துாய தமிழில் பெயர் பலகை இல்லை. முகப்பு பெயர் பலகையில், தமிழ் எழுத்துகளே முதன்மையானதாக இருக்க வேண்டும் என்ற, அரசின் உத்தரவை எவரும் பின்பற்றவில்லை. அரசாணையை மதிக்காமல் செயல்படும் இத்தகைய கடைகள், வணிக நிறுவனங்கள் மீது, தமிழக அரசு கடுமையான நடவடிக்கை எடுக்க வேண்டும் என, தமிழ் ஆர்வலர்கள் கோரிக்கை விடுத்துள்ளனர். இதுகுறித்து தமிழ் ஆர்வலர்கள் கூறியதாவது: தமிழகத்தில் கடைகள், உணவு அங்காடிகள், வணிக நிறுவனங்களின் பெயர் பலகையில், தமிழ் எழுத்துகளே முதன்மையானதாக இருக்க வேண்டும் என, 1983ல், தமிழக அரசு ஆணை பிறப்பித்தது. தேவைப்பட்டால் ஆங்கில எழுத்துகளை இரண்டாவதாகவும், பிற மொழி எழுத்துகளை மூன்றாவதாகவும் பயன்படுத்திக் கொள்ளலாம் என, அந்த அரசாணையில் குறிப்பிடப்பட்டிருந்தது. ஆனால், இந்த சட்டத்தை தமிழக அரசு முனைப்போடு செயல்படுத்த முன்வராத காரணத்தால், 90 சதவீத கடைகள், வணிக நிறுவனங்கள், தங்கள் விருப்பம் போல் ஆங்கிலம் மற்றும் பிற மொழிகளில் பெயர் பலகை வைத்துள்ளன. மேலும், பெரும்பாலான பெயர் பலகையில் கதவு எண், தெரு பெயர், சாலை பெயர் உள்ளிட்ட முகவரி எதுவும் குறிப்பிடப்படவில்லை. இதனால், அரசு மற்றும் தனியார் துறையில், கடித பரிமாற்ற சேவையில் ஈடுபட்டிருக்கும் ஊழியர்கள் மட்டுமின்றி, பொது மக்களும் சிரமப்படுகின்றனர். எனவே கடைகள், நிறுவனங்கள் உட்பட அனைத்து தனியார் பெயர் பலகைகளிலும் துாய தமிழில், தெளிவான முகவரியுடன் பெயர் பலகை வைப்பதை அரசு கட்டாயமாக்கிட வேண்டும். இதை மீறுவோர் மீது அபராதம், உரிமம் ரத்து ஆகிய நடவடிக்கைகளை எடுக்க முன்வந்தால் மட்டுமே, இதற்கு நிரந்தர தீர்வு காண முடியும். இவ்வாறு அவர்கள் கூறினர். மொழி உணர்வு மக்களிடையே குறைந்து வருகிறது. இதனால் தான், தமிழ் மறக்கப்பட்டு, ஆங்கிலத்திலும், 'தங்கிலிஷ்' என்ற புது வகையிலும் பெயர் பலகைகள் வைக்கப்படுகின்றன. தமிழின் தொன்மை, சிறப்பு, பெருமை குறித்து மக்களிடையே தன்னெழுச்சி உருவாகாத நிலையில், சட்டத்தின் வாயிலாக, கட்டுப்பாடுகள் மூலமாக இதை செயல்படுத்துவது, நடைமுறை சிக்கல் வாய்ந்தது. எனவே, மொழியின் முக்கியத்துவம் குறித்து மக்களிடையே தொடர் விழிப்புணர்வு ஏற்படுத்துதல் மிக அவசியம். இதை ஓர் இயக்கமாக அரசே நடத்த வேண்டும். -முனைவர் சே.கரும்பாயிரம், செம்மொழி தமிழாய்வு மத்திய நிறுவனம்