பைக்குகள் மோதிய தகராறில் வாலிபருக்கு காப்பு

செங்கல்பட்டு, பைக்குகள் மோதிக் கொண்டது தொடர்பான தகராறில், வாலிபரை போலீசார் கைது செய்தனர். செங்கல்பட்டு அடுத்த ஆத்துார் வடபாதி பகுதியைச் சேர்ந்தவர் சரவணன், 24. இவர் நேற்று முன்தினம் இரவு, தன் இருசக்கர வாகனத்தில், காஞ்சிபுரம் நோக்கிச் சென்றார். வில்லியம்பாக்கம் அருகே சென்ற போது நிலை தடுமாறி, முன்னால் சென்ற மற்றொரு இருசக்கர வாகனத்தின் மீது மோதியுள்ளார். இதனால், அந்த இருசக்கர வாகனத்தில் வந்த நபர், சரவணனை தாக்கி விட்டு தப்பிச் சென்றுள்ளார். புகாரின்படி, செங்கல்பட்டு தாலுகா போலீசார் வழக்கு பதிந்து விசாரித்தனர். இதில், சரவணனை தாக்கியது, தேவனுார் பகுதியைச் சேர்ந்த ஜீவா, 26, என்பதும், இவர் மீது பல்வேறு காவல் நிலையங்களில் வழக்குகள் உள்ளதும் தெரிந்தது. இதையடுத்து, ஜீவாவை கைது செய்த போலீசார், விசாரணைக்குப் பின் செங்கல்பட்டு நீதிமன்றத்தில் ஆஜர்படுத்தி, சிறையில் அடைத்தனர்.