குறைபிரசவத்தில் இரட்டை குழந்தைகள் காப்பாற்றிய எம்.ஜி.எம்., மருத்துவமனை

சென்னை: ஒரே நஞ்சுக்கொடி, ரத்த ஓட்டத்தில் மாறுபாட்டுடன், அரிதான கர்ப்பநிலை சிக்கலுடன் குறைபிரசவத்தில் பிறந்த இரட்டை குழந்தைகளையும், எம்.ஜி.எம்., ஹெல்த்கேர் மருத்துவமனை டாக்டர்கள் காப்பாற்றினர். இதுகுறித்து, மருத்துவமனை மகப்பேறு துறை தலைவர் ஜெயஸ்ரீ கஜராஜ், பச்சிளம் குழந்தை துறை தலைவர் சந்திரகுமார், வளர்கரு மருத்துவ நிபுணர் ராதிகா ரமேஷ் ஆகியோர் கூறியதாவது: தாயின் கருப்பைக்குள், ஒரே நஞ்சுக்கொடியை இரண்டு குழந்தைகள் பகிர்ந்திருந்தன. 'டுவின் - டு - டுவின் டிரான்ஸ்பியூஷ் சிண்ட்ரோம்' என்ற பாதிப்பு, இரண்டு குழந்தைகளையும் பாதித்தது. அதனால், ஒரு குழந்தைக்கு அதிகளவு ரத்தமும், மற்றொரு குழந்தைக்கு குறைந்தளவு ரத்தமும் சென்றது. 28 வார குறைபிரசவத்தில் குழந்தை பிறந்தது. அதில், ஒரு குழந்தை 1,115 கிராம் மற்றும் மற்றொரு குழந்தை 720 கிராம் எடையுடன் இருந்தது. எடை அதிகமுடைய குழந்தையை மட்டுமே காப்பாற்ற முடியும் என்ற நிலை இருந்தது. ஆனால், இரு குழந்தைகளுக்கும் எங்கள் குழுவினர், 55 நாட்கள் தீவிர சிகிச்சை அளித்தனர். நுரையீரல் உரிய வளர்ச்சி இல்லாததால், 20 நாட்கள் சுவாச உதவி அளிக்கப்பட்டது. இதுபோன்ற தொடர் சிகிச்சையால், இரு குழந்தைகளையும் காப்பாற்றி, இருவரும் முழு ஆரோக்கியத்துடன் உள்ளனர். இவ்வாறு அவர்கள் கூறினர்.