ஆட்டோ ஓட்டுநர் உயிரிழப்பு சகோதரர்கள் மீது கொலை வழக்கு

ஆவடி: ஆட்டோ ஓட்டுநர் மருத்துவமனையில் உயிரிழந்த நிலையில், அவரை தாக்கிய அண்ணன், தம்பி மீது கொலை வழக்கு பதிவு செய்யப்பட்டுள்ளது. ஆவடி, காமராஜர் நகர், ஸ்ரீதேவி நகரைச் சேர்ந்தவர் முத்து, 53; ஆட்டோ ஓட்டுநர். கடந்த 23ம் தேதி அதிகாலை சவாரி முடித்து, ஸ் ரீதேவி நகரில் உள்ள ஆட்டோ ஸ்டாண்டுக்கு திரும்பியுள்ளார். ஆட்டோ ஸ்டாண்ட் அருகே சாலையோரத்தில், அதே பகுதியைச் சேர்ந்த ஸ்ரீனிவாசன், 51, என்பவர், போதையில் படுத்திருந்தார். அந்நேரம் மது போதையில் இருந்த முத்து, 'இங்கெல்லாம் படுக்கக்கூடாது' எனக்கூறி அவரை அடித்து விரட்டி உள்ளார். இதுகுறித்து அறிந்த ஸ்ரீனிவாசனின் மகன்கள், ஜெபராஜ், 23, அருள், 21 ஆகி யோர், அங்கு சென்று ஆட்டோவில் துாங்கிக்கொண்டிருந்த முத்துவை சாலையில் கிடந்த செங்கல்லால் தாக்கினர். இதில், முகம் மற்றும் தலையில் பலத்த காயமடைந்த முத்து, கீழ்ப்பாக்கம் அரசு மருத்துவமனையில் அனுமதிக்கப்பட்டார். ஆவடி போலீசார் வழக்கு பதிந்து, ஜெபராஜ் மற்றும் அருளை கைது செய்து சிறையில் அடைத்தனர். இந்நிலையில், முத்து நேற்று அதிகாலை கீழ்ப்பாக்கம் அரசு மருத்துவமனையில் உயிரிழந்தார். இதையடுத்து, அடிதடி வழக்கு, கொலை வழக்காக மாற்றி பதிவு செய்யப்பட்டது.