சிதிலமான 377 வீடுகள் இடிப்பு பணியை துவங்கியது மாநகராட்சி

சென்னை: சிந்தாதிரிப்பேட்டை பம்பிங் ஸ்டேஷன் சாலையில் உள்ள, 377 வீடுகளை இடிக்கும் பணியை, மாநகராட்சியினர் நேற்று துவங்கினர். ராயபுரம் மண்டலத்திற்கு உட்பட்ட சிந்தாதிரிப்பேட்டையில், பம்பிங் ஸ்டேஷன் சாலை உள்ளது. இச்சாலையில் ஆக்கிரமித்து குடியிருப்போரின் வீடுகள் மிகவும் சிதிலமடைந்தன. பழைய வீடுகளை இடித்து அகற்றிவிட்டு, நகர்ப்புற வாழ்விட மேம்பாட்டு வாரியம் சார்பில், புதிதாக வீடுகள் கட்டித்தர, அரசு முடிவு செய்தது. இதற்காக நடந்த கணக்கெடுப்பில், 377 வீடுகள் சிதிலமடைந்து உள்ளது தெரியவந்தது. இதையடுத்து, 437 சதுர அடியிலான 377 வீடுகள் கட்டித்தர, 78 கோடி ரூபாய் ஒதுக்கப்பட்டது. இதற்காக, பழைய குடியிருப்புகளை பொக்லைன் வாகனத்தை வைத்து இடிக்கும் பணியை மாநகராட்சியினர் நேற்று துவங்கினர். அசம்பாவிதங்கள் ஏதும் நிகழாமல் இருக்க, அப்பகுதியில் போலீஸ் பாதுகாப்பு போடப்பட்டு உள்ளது.