ரூ.1 கோடி மோசடி செய்த தம்பதி உட்பட மூவர் கைது

சென்னை: இரிடியத்தில் முதலீடு செய்தால், 4 கோடி ரூபாய் தருவதாக, 1.22 கோடி ரூபாய் மோசடி செய்த தம்பதி உட்பட மூவர் கைது செய்யப்பட்டனர். மாதவரம், பொன்னியம்மன் மேடு பகுதியைச் சேர்ந்தவர் திவ்யா, 36. அவரின் கணவர் நந்தகோபாலனிடம், அதே பகுதியைச் சேர்ந்த விஸ்வநாதன் என்பவர், கார் ஓட்டுநராக வேலை பார்த்து வந்துள்ளார். அவர், திவ்யாவிடம், 'ஈரோடு மாவட்டம், காங்கேயத்தைச் சேர்ந்த என் நண்பர் ஜெகதீஷ், வெளிநாட்டில் இருந்து இரிடியம் என்ற அரிய உலோகத்தை இறக்குமதி செய்து, 10 மடங்கு லாபத்திற்கு விற்று வருகிறார். அவரிடம், முதலீடு செய்தால், குறுகிய காலத்தில் அதிக லாபம் தருவார்' என, ஆசைகாட்டி உள்ளார். கிண்டியில் உள்ள, ஹோட்டல் ஒன்றில், திவ்யா உள்ளிட்ட பெண்களை ஜெகதீஷ் சந்தித்தார். அப்போது ஜெகதீஷ், 'கப்பலில் இரிடியம் எடுத்து வரப்படுகிறது. நீங்கள் முதலீடு செய்தால் ஐந்து மடங்கு லாபம் தருகிறேன்' என கூறியுள்ளர். இதையடுத்து, திவ்யா உள்ளிட்ட பெண்கள், நகைகளை அடமானம் வைத்தும், கடன் வாங்கியும், விஸ்வநாதன், அவரின் மனைவி நந்தினி வாயிலாக, ஜெகதீஷிடம், 2019 - 2023 வரை, 1.22 கோடி ரூபாயை கொடுத்துள்ளனர். இந்த பணத்தை, இரிடியத்தில் முதலீடு செய்து, 4கோடி ரூபாய் தருவதாக விஸ்வநாதன், 48, நந்தினி, 45, மற்றும் ஜெகதீஷ், 43, ஆகியோர் மோசடி செய்துள்ளனர். சி.பி.சி.ஐ.டி., போலீசார் வழக்குப்பதிவு செய்து, மூவரையும் கைது செய்து, புழல் சிறையில் அடைத்துள்ளனர்.