உடல் நசுங்கி வேன் ஓட்டுநர் பலி ஹேண்ட் பிரேக் போடாததால் விபரீதம்

புழல்: வாகனத்தில் 'ஹேண்ட் பிரேக்' போடாததால், திடீரென பின்னோக்கி வந்த வேனில் சிக்கி உடல் நசுங்கி, வேன் ஓட்டுநர் பரிதாபமாக உயிரிழந்தார். சிவகங்கை மாவட்டம், தேவகோட்டையைச் சேர்ந்தவர் அஜித்குமார், 22; வேன் ஓட்டுநர். இவர், தேவகோட்டையில் இருந்து புழல் பகுதியில் உள்ள தனியார் நிறுவனத்திற்கு, 'பொலிரோ' லோடு வேனில் ஸ்டீல் ராடுகளை ஏற்றிக்கொண்டு, நேற்று முன்தினம் மாலை வந்தார். வேனை நிறுவனத்தின் வளாகத்திற்குள் நிறுத்துவதற்காக, கீழே இறங்கி வாகன நிறுத்துமிடத்தை பார்வையிட்டார். வாகனத்தில் 'ஹேண்ட் பிரேக்' போடாத காரணத்தால், மேடான பகுதியில் நிறுத்தப்பட்டிருந்த வேன், எதிர்பாராத விதமாக திடீரென கீழ் நோக்கி வரத் துவங்கியது. உடனே வேனை நிறுத்தும் அவசரத்தில், கதவை திறந்து கையாலேயே பிரேக்கை அழுத்தி, வேனை நிறுத்த அஜித்குமார் முயன்றார். அதற்குள், வேன் பக்கவாட்டு சுவர் அருகே வேகமாக மோதியது. இதில், சுவர் மற்றும் வாகனத்தின் இடையில் சிக்கிய அஜித்குமார், உடல் நசுங்கி பரிதாபமாக உயிரிழந்தார். விபத்து குறித்து புழல் போலீசார் விசாரிக்கின்றனர்.