ஏஐ தொழில்துறையின் முக்கிய தளமாக இருக்கும்! கல்லுாரி கருத்தரங்கில் தகவல்

பொள்ளாச்சி: 'செயற்கை நுண்ணறிவு எதிர்கால தொழில்துறையின் முக்கிய தளமாக இருக்கும்,' என, பொள்ளாச்சி மகாலிங்கம் பொறியியல் கல்லுாரியில் நடக்கும் கருத்தரங்கில் தெரிவிக்கப்பட்டது. பொள்ளாச்சி மகாலிங்கம் பொறியியல் மற்றும் தொழில்நுட்ப கல்லுாரியில், 'நிலையான உலகத்திற்கான செயல்பாட்டுப் பொருட்கள் மற்றும் பசுமைப் பொருட்களில் வளர்ந்து வரும் போக்குகள்' என்ற தலைப்பில்,அகில இந்திய தொழில்நுட்ப கல்விக்குழு நிதியுதவியுடன் நடைபெறும் இருநாள் கருத்தரங்கம் நேற்று துவங்கியது. மின் மற்றும் மின்னணுவியல் பொறியியல் துறைத் தலைவர் கணேஷ்குமார் வரவேற்றார். கல்லுாரி முதல்வர் கோவிந்தசாமி தலைமை வகித்தார். மின் மற்றும் மின்னணுவியல் பொறியியல் துறையின் பேராசிரியர் சித்ரா பேசினார். 'டாலண்ட் அக்விசிஷன்' துணைத் தலைவர் ரஷ்மி ரஞ்சன் பேசுகையில், ''துாய்மை, சுகாதாரம் மற்றும் ஜீரோ வேஸ்ட் என்ற நிலையை பேணும் நகர்ப்புற மாதிரியாக, மத்திய பிரதேசம் திகழ்கிறது. கோவை வேகமாக 'ஐடி' மையமாக உருவெடுத்து வருகிறது. அடுத்த பத்தாண்டுகளில் இந்தத் துறை மேலிடத்தைப் பிடிக்கும். செயற்கை நுண்ணறிவு எதிர்கால தொழில்துறையின் முக்கிய தளமாக இருக்கும் என்பதையும், 'ஏஐ'-யை அடிப்படை திறனாக அனைவரும் ஏற்றுக்கொள்ள வேண்டும். இவ்வாறு, பேசினார். 'பிரை இன்போடெக்' நிறுவனர் மற்றும் தலைமை நிர்வாக அதிகாரி கோகுல் பேசியதாவது: எதிர்கால சமூகங்களை வடிவமைப்பதில், அறிவியல் மற்றும் தொழில்நுட்பத்தின் முக்கியத்துவத்தை அனைவரும் உணர வேண்டும். அறிவியலில் மதிப்பு சேர்க்கையே உண்மையான நோக்கத்தையும் அர்த்தத்தையும் வழங்கும். மின் மற்றும் மின்னணு பொறியியல் மாணவர்கள், 'அடுத்த தலைமுறை டிரான்சிஸ்டர்களாக' முக்கிய தொழில்நுட்ப முன்னேற்றங்களை வழிநடத்துவர். சுற்றுச்சூழல் நிலைத்தன்மை கொண்ட சமூகங்களை உருவாக்க மாணவர்கள் தீவிரமாக செயல்பட வேண்டும். மரங்கள் வெட்டுதல் மற்றும் கடல் சேதம் போன்ற புறநிலை விளைவுகள் எதிர்காலத்துக்கு பாதிப்பை ஏற்படுத்தும் என்பதால், அவற்றை படிப்படியாக குறைக்க வேண்டும். இவ்வாறு, பேசினார். இயற்பியல் துறையின் உதவி பேராசிரியர் ரெஜினா டெல்சி நன்றி கூறினார்.