அ.தி.மு.க. கவுன்சிலர்கள் சஸ்பெண்ட்! மெட்ரோ பிரச்னையில் மோதல்

கோவை: கோவை மாநகராட்சி கூட்டம், மேயர் ரங்கநாயகி தலைமையில் நேற்று நடந்தது. கமிஷனர் சிவகுரு பிரபாகரன் முன்னிலை வகித்தார்.கூட்டம் தொடங்குவதற்கு முன்பே, அ.தி.மு.க. கவுன்சிலர்கள் பிரபாகரன், ரமேஷ் ஆகியோர், அரங்கத்துக்கு வெளியே நின்று, மெட்ரோ ரயில் திட்ட அறிக்கையை முறையாக தயாரித்து சமர்ப்பிக்காத, தமிழக அரசை கண்டித்து கோஷமிட்டனர். அதற்கு போட்டியாக, தி.மு.க. கூட்டணி கவுன்சிலர்கள் மத்திய அரசை கண்டித்து, கோஷம் எழுப்பினர். கூட்டம் துவங்கியதும், மெட்ரோ ரயில் திட்டத்தை நிராகரித்த மத்திய அரசை கண்டித்து காங்கிரஸ், மார்க்சிஸ்ட் கம்யூனிஸ்ட், கொ.ம.தே.க. உறுப்பினர்கள் பேசினர். அ.தி.மு.க. கவுன்சிலர் பிரபாகரன், 'மெட்ரோ திட்டத்துக்கு தவறான அறிக்கை சமர்ப்பித்த தமிழக அரசை கண்டிக்கிறோம்' என்று கூறி, மேயரை நோக்கி பதாகையை உயர்த்தி காட்டினார். அவரை தி.மு.க. கூட்டணி உறுப்பினர்கள் முற்றுகையிட்டு வாக்குவாதம் செய்தனர். பிரபாகரன் வைத்திருந்த பதாகையை, 82வது வார்டு கவுன்சிலர் முபஷீரா பறிக்க முயன்றார். இருக்கை மீது ஏறி, பதாகையின் ஒரு பகுதியை கிழித்தார். 33வது வார்டு கவுன்சிலர் கிருஷ்ணமூர்த்தி, மீதி பதாகையை பறித்து, கிழித்தெறிந்தார். தி.மு.க. கூட்டணியினர் மத்திய அரசையும், அ.தி.மு.க.வையும் கண்டித்து கோஷம் எழுப்பினர். அ.தி.மு.க. கவுன்சிலர்கள் இருவரும், 'போடாதே, போடாதே, பகல் வேஷம் போடாதே, ஏமாற்றாதே, ஏமாற்றாதே' என கோஷமிட்டபடி வெளிநடப்பு செய்தனர். மன்றத்தின் மாண்பை சீர்குலைத்ததாக கூறி, அவர்களை 2 மாதம் சஸ்பெண்ட் செய்வதாக மேயர் அறிவித்தார். அதன்பின், மெட்ரோ ரயில் திட்டத்தை நிராகரித்ததற்காக, மத்திய அரசை கண்டித்து தீர்மானம் நிறைவேற்றப்பட்டது.

கோவையை அழிக்க சதியா?

அ.தி.மு.க. கவுன்சிலர் பிரபாகரன் நிருபர்களிடம் பேசுகையில், ''மெட்ரோ திட்டம் 2020ல் அ.தி.மு.க. ஆட்சியில் பரிந்துரைக்கப்பட்டது. தி.மு.க. ஆட்சிக்கு வந்ததும் கிடப்பில் போட்டது. 2024ல் மத்திய அரசுக்கு திட்ட அறிக்கை அனுப்பியது. விதிமுறைகளை படித்து பார்க்காமல், கோவையை அழித்து மெட்ரோ ரயில் ஓடும் வகையில் அந்த அறிக்கையை தயாரித்துள்ளனர். ''மக்களை துரத்தி விட்டு, கட்டடங்களை இடித்து விட்டு மெட்ரோ ரயில் கொண்டு வர சொல்கிறீர்களா? என்று கேட்டு, அறிக்கையை மத்திய அரசு திருப்பி அனுப்பியது. அதை மறைத்து விட்டு, மத்திய அரசு நிராகரித்து விட்டதாக பொய்யை பரப்பி, மக்களை ஏமாற்றுகிறது திமுக அரசு,'' என்றார்.