மத்திய பஸ் ஸ்டாண்ட் முன் பஸ்கள் குண்டக்க மண்டக்க

கோவை: காந்திபுரம் வெளியூர் பஸ் ஸ்டாண்ட்டுக்கு, நாளொன்றுக்கு 998 பஸ்கள் வந்து செல்கின்றன. பல்லடம் வழியாக திருப்பூர், அவிநாசி வழியாக திருப்பூர், கோபி, அந்தியூர், சத்தியமங்கலம், கரூர், ஈரோடு, சேலம் செல்லும் பஸ்கள், இங்கிருந்து இயக்கப்படுகின்றன. பஸ்களை நிறுத்த போதுமான 'ரேக்'குகள் இல்லை. இட வசதியும் இல்லாததால், பஸ்கள் ஒன்றன் பின் ஒன்றாக நிறுத்தப்படுகின்றன. பஸ்கள் நுழையும் பகுதியில் பார்சல்கள் இறக்கப்படுகின்றன. இதனால், மற்ற பஸ்கள் செல்ல வழி கிடைக்காததால், பஸ் ஸ்டாண்ட் வளாகத்திலும், ரோட்டிலும் நிறுத்தப்படுகின்றன. அதனால், நஞ்சப்பா ரோட்டில் போக்குவரத்து நெருக்கடி ஏற்படுகிறது. நேற்றும் இது நடந்தது. பஸ்கள் நஞ்சப்பா ரோட்டில் வரிசையாக நிறுத்தப்பட்டன. பயணிகள் ஆங்காங்கே இறக்கி விடப்பட்டனர். மற்ற வாகனங்கள் செல்ல முடியாமல் நெருக்கடி ஏற்பட்டது. இதை தவிர்க்க, பஸ் ஸ்டாண்ட்டுக்குள் பஸ்கள் நிறுத்துவதை முறைப்படுத்த வேண்டும். இதனிடையே ராம்நகர் பகுதியில் இருந்து, கம்பிகளின் இடையே புகும் இருசக்கர வாகன ஓட்டிகளால் விபத்து அபாயம் உள்ளது. போலீசாரும் இணைந்து முன்னெச்சரிக்கை நடவடிக்கை எடுக்க வேண்டும்.