கவுன்சில் கூட்டத்தில் தி.மு.க., கவுன்சிலர்கள் வாக்குவாதம்: துணைத்தலைவரை ஒருமையில் பேசியதால் பரபரப்பு

வால்பாறை: வால்பாறை நகராட்சி கூட்டத்தை நடத்த விடாமல் தி.மு.க.,கவுன்சிலர்கள் வாக்குவாதத்தில் ஈடுபட்டதால் பரபரப்பு ஏற்பட்டது. வால்பாறை நகராட்சியில், அவசரக்கூட்டம் தலைவர் அழகுசுந்தரவள்ளி தலைமையில் நடந்தது. கூட்டம் துவங்கியதும், நகராட்சியில் நியமன உறுப்பிரனாக பொறுப்பேற்றுக்கொண்ட அம்பிகாவுக்கு வாழ்த்து தெரிவிக்கப்பட்டது. அதன்பின், நகராட்சி அதிகாரிகள் தீர்மானத்தை வாசிக்க துவங்கினர். அப்போது அரங்கிற்குள் நுழைந்த கவுன்சிலர்கள் செல்வக்குமார், அன்பரசு, மணிகண்டன் ஆகியோர், எல்லா கவுன்சிலர்களும் வராமல் எப்படி கூட்டம் நடத்தலாம். ஐந்து நிமிடம் காத்திருக்க முடியாதா என, தலைவரை பார்த்து கேள்வி கேட்டனர். அதன்பின், வார்டில் ஏராளமான பிரச்னைகள் உள்ளது. பிரச்னைகள் குறித்து கவுன்சிலர்கள் பேசிய பின் கூட்டம் நடத்தினால் போதும். இங்க என்ன சர்வாதிகார ஆட்சியா நடக்கிறது என கேள்வி எழுப்பினர். தொடர்ந்து தலைவரை பேச விடாமல் வாக்குவாதத்தில் ஈடுபட்டதால் தீர்மானம் வாசிப்பது பாதியில் நிறுத்தப்பட்டது. தலைவர் பேசும்போது, ''காலை, 11:00 மணிக்கு மன்றக்கூட்டம் நடைபெறும் என அறிவிக்கப்பட்ட நிலையில், குறிப்பிட்ட நேரத்தில் மன்றக்கூட்டம் நடத்தப்படுகிறது. யாருக்காகவும் காத்திருக்க முடியாது,'' என்றார். துணைதலைவர் செந்தில்குமார் பேசுகையில், வளர்ச்சிப்பணிகள் தான் முக்கியம். தீர்மானம் வாசிக்கட்டும். அதன்பின் கவுன்சிலர்கள் பேசலாம்,'' என்றார். அப்போது குறுக்கிட்ட, அ,தி.மு.க.,கவுன்சிலர் மணிகண்டன் எதிர்ப்பு தெரிவித்ததோடு, ''நீ யார் எங்களுக்கு அறிவுரை சொல்ல, உனக்கு யாரு இங்க உட்கார சீட் கொடுத்தது,'' என ஒருமையில் பேசி வாக்குவாதத்தில் ஈடுபட்டார். அவருக்கு ஆதரவாக தி.மு.க., கவுன்சிலர்கள் அன்பரசு, செல்வக்குமாரும் பேசியதால் மன்றக்கூட்டத்தில் சலசலப்பு ஏற்பட்டது. பதிலளித்த துணைத்தலைவர்கள், 'எனக்கு ஒதுக்கப்பட்ட இருக்கையில் தான் அமர்ந்திருக்கேன். தேவையற்ற பேச்சுக்களை தவிர்ப்பது நல்லது,' என்றார். தொடர்ந்து பிற கவுன்சிலர்கள் பேசும் போது, 'கடந்த நான்கு ஆண்டுகளாக வார்டில் எந்த வேலையும் நடக்கவில்லை. தேர்தல் வரப்போகுது, வார்டுகளில் தெருவிளக்கு கூட எரிவதில்லை. தேர்தலுக்கு முன்பாக வார்டுகளில் வளர்ச்சிப்பணிகளை விரைந்து செயல்படுத்த வேண்டும். குறிப்பாக, தெருவிளக்கு பிரச்னைக்கு நகராட்சி அதிகாரிகள் நிரந்தர தீர்வு காண வேண்டும்,' என்றனர். பதிலளித்த தலைவர், ''தெருவிளக்குகளை பொறுத்த வரை நகராட்சி பொறியாளர் தான் பொறுப்பு. இது குறித்து நீங்கள் அவரிடம் புகார் தெரிவிக்கலாம். வார்டுகளில் கூடுதல் தெருவிளக்குகள் அமைக்கும் பணி விரைவில் துவங்கப்படும்,'' என்றார். அதன்பின், தொடர்ந்து நடந்த கூட்டத்தில் மொத்தம் நான்கு தீர்மானங்கள் நிறைவேற்றப்பட்டன.

வீடியோ எடுப்பதில் கவனம்!

வால்பாறை நகராட்சி கூட்டம் துவங்கியதும், 12வது வார்டு தி.மு.க.,கவுன்சிலர் அன்பரசன், அவருக்கு ஒதுக்கப்பட்ட இருக்கையில் அமராமல் கூட்டத்தில் நடக்கும் விவாதங்களை, அவரது மொபைல்போனில் வீடியோ எடுப்பதிலேயே குறியாக இருந்தார். இடையிடையே வார்டில் வளர்ச்சிப்பணிகள் நடைபெறாதது குறித்து நகராட்சி தலைவரிடத்தில் விவாதத்திலும் ஈடுபட்டார். மன்றக்கூட்டம் நிறைவடையும் சில நிமிடங்களுக்கு முன், அவரது இருக்கையில் அமர்ந்தார்.