பரிந்துரை சீட்டின்றி விற்க கூடாது: மருந்துக்கடைகளுக்கு எச்சரிக்கை

கோவை: ஆன்டிபயாடிக் மருந்துகளை, டாக்டர் பரிந்துரை சீட்டு இன்றி விற்பனை செய்யும் மருந்துக்கடைகள் மீது நடவடிக்கை எடுக்கப்படும் என, கோவை மருந்து கட்டுப்பாட்டுத்துறை உதவி இயக்குனர் மாரிமுத்து கூறினார்: அவர் கூறியதாவது: ஆன்டிபயாடிக் மருந்துகளை டாக்டர்கள் பரிந்துரை சீட்டு இன்றி விற்பதும், வாங்கி பயன்படுத்துவதும் கூடாது. விதிமுறை மீறி விற்பனை செய்தால், நடவடிக்கை எடுக்கப்படும். டாக்டர்கள் ஆன்டிபயாடிக் மருந்துகளை, நான்கு நாட்களுக்கு எழுதிக்கொடுத்தால், தொய்வு விடாமல் நான்கு நாட்கள் முழுமையாக எடுத்தால் மட்டுமே கிருமிகள் அழியும். பாதியில் நிறுத்துவதால், கிருமிகளின் நோய் எதிர்ப்பு திறனை அதிகரித்துவிடும். டாக்டர்கள், மருந்துக்கடை உரிமையாளர்கள், ஆன்டிபயாடிக் மருந்து பயன்பாடு குறித்து மக்களுக்கு விழிப்புணர்வு ஏற்படுத்த வேண்டும். விதிமுறை மீறி விற்றால், கடுமையான நடவடிக்கை எடுக்கப்படும். இவ்வாறு, அவர் கூறினார்.