தகுதிச்சான்று கட்டணத்தை ரத்து செய்ய லாரி உரிமையாளர் சங்கம் வலியுறுத்தல்

கோவை: மத்திய சாலை போக்குவரத்து அமைச்சகம் உயர்த்திய, வாகனங்களுக்கான தகுதிச்சான்று கட்டணத்தை, உடனடியாக ரத்து செய்ய, கோயமுத்துார் லாரி உரிமையாளர்கள் சங்கம் வலியுறுத்தியுள்ளது. சங்க நிர்வாகிகள் முருகேசன், வெங்கடேஷ் ஆகியோரது அறிக்கை: மத்திய சாலை போக்குவரத்து அமைச்சகம் மோட்டார் வாகன சட்டம் 1989ன் படி, இருசக்கர வாகனம் முதல் கனரக வாகனம் வரையிலான, அனைத்து வாகனங்களுக்கும் தகுதிச் சான்று (எப்.சி.) கட்டணத்தை உயர்த்தியுள்ளது. இதில் 10 லிருந்து 13 ஆண்டுக்குட்பட்ட வாகனங்களுக்கு, ரூ.1,000 மும், 13 முதல் 15 ஆண்டுக்குட்பட்ட வாகனங்களுக்கு ரூ. 5,000, 15 - 20 ஆண்டுகளுக்குட்பட்ட வாகனங்களுக்கு ரூ.12,500, 20 ஆண்டுகளுக்கு மேற்பட்ட வாகனங்களுக்கு ரூ. 25,000 என தகுதிச் சான்று பெற, கட்டணம் நிர்ணயிக்கப்பட்டுள்ளது. சோதனைக் கட்டணம் மற்றும் சேவைக்கட்டணம் தனி. இக்கட்டண உயர்வு நடைமுறைக்கு வந்துள்ளது. இதனால் ஓரிரு வாகனங்களை வைத்து லாரித் தொழில் செய்பவர்கள், பெரிதும் பாதிக்கப்படுவர். பெரும்பாலும் 15 ஆண்டுகளுக்கு மேற்பட்ட, பழைய வாகனங்களை வைத்துக்கொண்டு நெல், காய்கறி போன்ற அத்தியாவசிய பொருட்களை ஏற்றிச் செல்கின்றனர். இதனால் இத்தொழிலை விட்டே வெளியேற வேண்டிய சூழலுக்கு தள்ளப்பட்டுள்ளனர். தற்போது தொழில்கள் நலிவடைந்த நிலையில், லாரிகளுக்கு சரியாக லோடு கிடைக்காமலும், சுங்க கட்டணம், டீசல் விலை, காப்பீட்டுத்தொகை, உதிரிப்பாகங்களின் விலை உயர்வாலும், லாரித் தொழில் நலிவடைந்துள்ளது. தகுதிச் சான்று கட்டணம் உயர்த்தும் போது, 15 ஆண்டுகளுக்கு மேற்பட்ட ஓரிரு வாகனங்களை வைத்திருக்கும் லாரி உரிமையாளர்கள், குடும்பங்களை காப்பாற்ற இயலாமல் வாழ்வாதாரம் கேள்விக்குறியாகும் நிலைக்கு தள்ளப்படுவர். அதனால், மத்திய சாலைப்போக்குவரத்து அமைச்சகம் கட்டண உயர்வை உடனடியாகக் கைவிட வேண்டும். இவ்வாறு, வேண்டுகோள் விடுத்துள்ளனர்.