குளக்கரையில் பனை விதை நடவு

அன்னுார்; கெம்பநாயக்கன்பாளையத்தில் ஒரே நாளில் 750 பனை விதைகள் நடப்பட்டன. விவேகானந்தா ஆண்கள் சுய உதவிக் குழு மற்றும் அருணாச்சலா பெட்ரோல் பங்க் சார்பில் கெம்பநாயக்கன் பாளையம் குளக்கரையில் பனை விதை நடும் பணி நடந்தது. இதில் குளத்தின் கரையை ஒட்டிய பகுதிகளில் ஒரே நாளில் 750 பனை விதைகள் நடப்பட்டன. 30-க்கும் மேற்பட்ட தன்னார்வலர்கள் பங்கேற்றனர். இதுகுறித்து தன்னார்வலர்கள் கூறுகையில், 'பனை கடும் வறட்சியையும் தாங்கி வளரக்கூடியது. நிலத்தடி நீரை சேமிக்கும். குளத்தில் ஏற்படும் மண் அரிப்பையும் தடுக்கும். பல்வேறு உயிரினங்களுக்கு வாழ்விடமாகவும் பனைமரம் உள்ளது. எனவே வாய்ப்புள்ள இடங்களில் பனை விதை விதைக்க வேண்டும்,' என்றனர்.