நகைக்கடை ஊழியரிடம் ரூ.40 லட்சம் பறிமுதல்

போத்தனுார்: தமிழக --- கேரள எல்லையான வேலந்தாவளம் சோதனை சாவடியில், நேற்று காலை போலீசார் வாகன சோதனையில் ஈடுபட்டனர். கேரளா நோக்கி சென்ற ஸ்கூட்டரை நிறுத்தி சோதனையிட்டபோது, கட்டுக்கட்டாக ரூபாய் நோட்டுகள் மொத்தம் ரூ.40 லட்சம் இருப்பது தெரிந்தது. விசாரணையில், ஸ்கூட்டரில் சென்றவர் கேரள மாநிலம் பாலக்காடு மாவட்டம், வாணியம்குளத்தை சேர்ந்த சுதீர் 55 என்பது தெரிந்தது. இவர் ஒத்தப்பாலத்தில் கண்ணன் என்பவரின் நகைக்கடையில் வேலை பார்த்து வருகிறார். கண்ணன், இவரிடம் 358 கிராம் தங்கத்தை கொடுத்து, கோவையில் விற்று வருமாறு கூறியுள்ளார். ஸ்கூட்டரில் கோவை வந்த சுதீர், பி.கே. வீதியில நகையை விற்று, ரூ.40 லட்சம் ரொக்கத்துடன் கேரளா சென்றது தெரிந்தது. உரிய ஆவணங்கள் இல்லாததால் ரொக்கம், வாகனத்துடன் சுதீர், க.க.சாவடி போலீஸ் ஸ்டேஷன் அழைத்து செல்லப்பட்டார். அதிகாரிகள் விசாரணைக்கு பின், வருமான வரித்துறையினரிடம் ஒப்படைக்கப்பட்டார்.