கலை திருவிழாவில் மாணவர்கள் அசத்தல்

கிணத்துக்கடவு: கிணத்துக்கடவு, நல்லட்டிபாளையம் ஊராட்சி ஒன்றிய நடுநிலைப்பள்ளி மாணவர்கள் கலைத்திருவிழாவில் திறமைகளை வெளிப்படுத்தி அசத்தினர். பள்ளி மாணவர்களின் பாட்டு, பேச்சு, நாடகம், ஓவியம் உள்ளிட்ட திறமைகளை வெளிப்படுத்தும் வகையில், அரசு சார்பில் ஆண்டுதோறும் கலைத் திருவிழா நடத்தப்படுகிறது. குறுமையம், வட்டாரம், மாவட்டம் மற்றும் மாநில அளவில் போட்டிகள் நடத்தப்பட்டு பரிசுகள் வழங்கப்படுகிறது. இதில், மாவட்ட அளவில் நடந்த கலைத் திருவிழா போட்டியில் கிணத்துக்கடவு ஒன்றியத்திற்குட்பட்ட நல்லட்டிப்பாளையம் ஊராட்சி ஒன்றிய நடுநிலைப்பள்ளியை சேர்ந்த, வள்ளிமானுஸ்ரீ (5ம் வகுப்பு) மற்றும் சரண் (2ம் வகுப்பு) முதல் பரிசும், ரோகிணி (5ம் வகுப்பு) இரண்டாம் பரிசும் பெற்றனர். மேலும், ஆறு முதல் எட்டாம் வகுப்பு வரை உள்ள பிரிவில் கார்த்திகேயன் மூன்றாம் பரிசு பெற்றார். இதே போன்று, வானவில் மன்றம் போட்டியில் எட்டாம் வகுப்பை சேர்ந்த விஷ்வா என்ற மாணவன் மாவட்ட அளவில் இரண்டாம் இடம் பிடித்துள்ளார். போட்டியில் வெற்றி பெற்ற மாணவர்களை, பள்ளி தலைமை ஆசிரியர் செல்வராணி மற்றும் ஆசிரியர்கள் பாராட்டினர்.