கோவை சாலையில் டயர் பதித்த முதல் வாகனம் சைக்கிள்தான்!

நா ம் இன்று பஸ், கார், லாரி, பைக் என்று எண்ணற்ற வாகனங்களில் பயணித்து மகிழ்கிறோம். ஆனால், 115 ஆண்டுகளுக்கு முன் கோவையில் மாட்டு வண்டி, குதிரைவண்டி தவிர, வேறு எதுவுமே இல்லை. தார் சாலைகளே இல்லாத காலம் அது. கோவை-திருச்சி தார் சாலை கூட, 1912-ல் தான் அமைக்கப்பட்டது. அந்த காலத்தில் மேற்கத்திய நாடுகளில், 'சைக்கிள்' என்ற பெயரில் உருவான ஒரு புதிய வாகனம், பெரும் வியப்பை ஏற்படுத்தியது. அந்த சைக்கிளை ஒருமுறையாவது பார்த்து விட வேண்டும் என்ற ஆர்வம், கோவை மக்களுக்குள் அதிகரித்தது. ஆனால் அதை இங்கே தயாரிக்க வழியே இல்லை; வெளிநாட்டிலிருந்துதான் இறக்குமதி செய்தாக வேண்டும். இன்றைய துறைமுகங்களைப் போலவே, 1895-ல் கோவைக்குச் சரக்குகள் வந்திறங்கிய போதுதான் சைக்கிள் வாகனமும் வந்தது. அப்போது அதன் விலை 25 ரூபாய். ஆனால் அது 'ஆடம்பரப் பொருள்' என்று கருதப்பட்டது. சைக்கிள் வைத்திருப்பவர்களை மக்கள் மதிப்புடன் பார்த்தார்கள். அந்த முதல் சைக்கிளை கொண்டு வந்தவர், ஸ்டேன்ஸ் மில் நிறுவிய ராபர்ட் டி.ஸ்டேன்ஸின் உதவியாளர் 'பிரேசர்'. அவரின் பெயரையே, கோவையில் ஒரு இடத்துக்கு 'பிரேசர் டவுன்' என்று வைத்தார்கள். அந்த இடம் எது தெரியுமா? இன்று ஸ்டேன்ஸ் மில்லின் எதிர்ப்புறமும், தலைமை தபால் அலுவலகத்தின் வடப்புறமும் உள்ள பகுதியே, அந்த பிரேசர் டவுன். இன்று கோவையில் பல வித வாகனங்களின் எண்ணிக்கையால், போக்குவரத்தே ஸ்தம்பிக்கும் நிலை உள்ளது. ஆனாலும், கோவை சாலையில் 'டயர்' பதித்த அந்த சைக்கிளை மறக்க முடியுமா!