பொதுமயானத்தில் குப்பை மலை: ஊராட்சி மக்கள் போராட முடிவு

தொண்டாமுத்தூர்: பேரூர் செட்டிபாளையம் ஊராட்சியில் ஆறுமுக கவுண்டனூர், பேரூர் செட்டிபாளையம், பச்சாபாளையம் கிராமங்கள் உள்ளன. 25 ஆயிரத்துக்கு மேற்பட்ட மக்கள் வசிக்கின்றனர். தினசரி சேரும் குப்பையை, முறையாக அகற்றாமல், சிறுவாணி மெயின் ரோட்டில் உள்ள மயானத்தில் கொட்டி வருகின்றனர். இதனால், அப்பகுதி முழுவதும் துர்நாற்றம் வீசுகிறது. பல முறை புகார் அளித்தும், நடவடிக்கை எடுக்காத ஊராட்சி நிர்வாகத்தை கண்டித்து, பகுதி மக்கள் போராட்டம் நடத்த முடிவு செய்துள்ளனர். இது குறித்து மக்களிடம் பேசியபோது, 'தினசரி 4 டன் குப்பை சேர்கிறது. 500 கிலோ மட்டுமே மக்கும் குப்பை; 3.5 டன் மக்காத குப்பை. அதை கொட்ட ஊராட்சியில் இடமில்லை. கோவை மாநகராட்சியிடம் குப்பையை கொடுத்து வந்தனர். என்ன காரணத்தாலோ, திடீரென அதை கைவிட்டு, 10 மாதமாக, மயானத்தில் குப்பையை குவித்து வருகின்றனர். அங்கு 100 டன்னுக்கு மேல் குப்பை குவிந்துள்ளது. துர்நாற்றம் வீசுவதோடு, குப்பையில் இருந்து பூச்சிகள், வண்டுகள் உருவாகிறது. மயானத்தின் பின்புறம், சொட்டையாண்டி குட்டை உள்ளது. அதுவும் மாசுபடுகிறது. சடலத்துடன் வருபவர்கள், குப்பைக்கு இடையே இறுதி சடங்கு செய்யும் அவல நிலை பரிதாபமாக உள்ளது. சுகாதாரத்தை பேண வேண்டிய ஊராட்சி நிர்வாகமே, சுகாதார சீர்கேட்டை உருவாக்கி வருவதை கண்டித்து, போராட்டம் நடத்தவுள்ளோம்' என்றனர்.