காட்டு மாட்டுடன் கன்றுக்குட்டி : கண்டு ரசித்த சுற்றுலா பயணியர்

வால்பாறை: அதிரப்பள்ளி அருவிக்கு செல்லும் வழித்தடத்தில் காட்டுமாடு, கன்றுக்குட்டிக்கு பால் கொடுப்பதை கண்டு, சுற்றுலா பயணியர் வாகனங்களை நிறுத்தி இயக்கினர். வால்பாறைக்கு வரும் சுற்றுலா பயணியர், கேரள மாநிலத்துக்கு உட்பட்ட அதிரப்பள்ளி அருவிக்கு அதிகளவில் செல்கின்றனர். வால்பாறை -- அதிரப்பள்ளி ரோட்டில் வனவிலங்குகள் அதிகளவில் இருப்பதால், சுற்றுலா வாகனங்களை மிதவேகத்தில், மிக கவனமாக இயக்க வேண்டுமென வனத்துறையினர் அறிவுறுத்தியுள்ளனர். இந்நிலையில், நேற்று காலை அதிரப்பள்ளி அருவிக்கு செல்லும்வழித்தடத்தில், பந்தடிப்பாலம் பகுதியில் காட்டுமாடு கன்றுக்குட்டிக்கு பால் கொடுத்தது. இதை கண்ட சுற்றுலா பயணியர் தங்களது வாகனங்களை இயக்காமல் நிறுத்தினர். கன்றுக்குட்டியுடன் காட்டு மாடு நகர்ந்து சென்ற பின், வாகனங்களை இயக்கினர். இதனை, சுற்றுலா பயணியர் வீடியோ எடுத்தனர். வனத்துறை அதிகாரிகள் கூறுகையில், 'வால்பாறை - அதிரப்பள்ளி ரோட்டில் யானை, காட்டுமாடு, கரடி, மான் உள்ளிட்ட வனவிலங்குகள் அதிகளவில் உள்ளன. வனவிலங்குகளுக்கு இடையூறு ஏற்படாத வகையில் சுற்றுலா பயணியர் தங்களது வாகனங்களை இயக்க வேண்டும்,' என்றனர்.