மனமும், உடலும் ஒரு நிலையில் இருக்கும் போது வெற்றி நிச்சயம்

கோவை: ஸ்ரீநேரு மஹா வித்யாலயா கலை மற்றும் அறிவியல் கல்லுாரியில், 'கிரிடோத்ஸவா 2025' விழாவை முன்னிட்டு, பள்ளிகளுக்கு இடையே விளையாட்டுப் போட்டிகள் நடந்தன. நிகழ்ச்சியில் சிறப்பு விருந்தினராக பங்கேற்ற, மாவட்ட உடற்கல்வி ஆய்வாளர் குமரேசன் பேசுகையில், ''உங்களுக்குள் பிறந்தது தான் விளையாட்டுத்திறமை. மனமும், உடலும் ஒரு நிலையில் இருக்கும் போதுதான் வெற்றி நிச்சயிக்கப்படுகிறது. விளையாட்டு ஒழுக்கத்தை கற்பிக்கிறது,'' என்றார். விழாவில் கோவை மற்றும் அதை சுற்றியுள்ள மாவட்டங்களை சேர்ந்த பள்ளிகளில் இருந்து, 1132 மாணவர்களும், 62 ஆசிரியர்களும் பங்கேற்றனர். மட்டைப்பந்து போட்டி, கால்பந்து போட்டி, எறிபந்து போட்டி, கோ-கோ போட்டி, கபடி போட்டி, சதுரங்கப் போட்டி, கேரம் போட்டி டேபிள் டென்னிஸ் போட்டி, டேக்வாண்டோ போட்டி, சிலம்பம் ஆகிய போட்டிகளில் வென்ற மாணவர்களுக்கு, ரொக்கப்பரிசாக ரூபாய் 2 லட்சமும், பதக்கங்கள், சான்றிதழ்கள் வழங்கப்பட்டன. முதல்வர் சுப்பிரமணி, செட்டிபாளையம் போலீஸ் இன்ஸ்பெக்டர் பிரேம் ஆனந்த், மேலாண்மைத்துறை இயக்குனர் முத்துகுமார் உட்பட பலர் பங்கேற்றனர்.