இ--ஆட்டோவுக்கு ரூ.4 லட்சம் கடன்: தகுதியான பெண்களுக்கு வாய்ப்பு

கோவை: பொருளாதாரத்தில் பின்தங்கிய மகளிருக்கான இ--ஆட்டோ வழங்கும் நிகழ்ச்சி, மாவட்ட மத்திய கூட்டுறவு வங்கி பாப்பம்பட்டி கிளை வாயிலாக நடந்தது. வங்கியின் முதன்மை வருவாய் அலுவலர் தியாகு வரவேற்றார். மாவட்ட மத்திய கூட்டுறவு வங்கியின் மேலாண் இயக்குனர் ராமகிருஷ்ணன் பேசியதாவது: பொருளாதாரத்தில் பின்தங்கிய மகளிருக்கான வருமானத்தை பெருக்கவும், அங்கீகாரம் கிடைக்கவும், இதுபோன்ற இ--ஆட்டோ வாயிலாக வருமானம் ஈட்டலாம். இ--ஆட்டோ கடன் பெற, நான்கு சக்கர வாகன ஓட்டுநர் உரிமம் மற்றும் ஆட்டோ ரிக் ஷா ஓட்டுவதற்கான பொது சேவை வாகன அங்கீகாரம் பெற்றிருக்க வேண்டும். 25ல் இருந்து 45 வயதுக்குள் இருக்க வேண்டும். விலைப்புள்ளியில் 10 சதவீதம் விளிம்பு தொகை செலுத்த வேண்டும். மூன்று ஆண்டுகளுக்குள் திருப்பி செலுத்த வேண்டும். இவ்வாறு, அவர் கூறினார். வங்கியின் பாப்பம்பட்டி கிளையின் வாடிக்கையாளர் நித்யாவுக்கு, ரூ.4 லட்சம், மகளிருக்கான இ--ஆட்டோ கடன் வழங்கினார். இரண்டு சுய உதவிக்குழுக்களுக்கு 27 லட்சம், பண்ணை சாரா கடன் திட்டத்தின் வாயிலாக, ஒரு லட்சம், மாற்றுத்திறனாளிகளுக்கான கடன் ஒருவருக்கு 50 ஆயிரம் உட்பட ரூ.32.50 லட்சம் மதிப்பில் கடன் வழங்கப்பட்டது. வங்கியின் பொது மேலாளர் ரமேஷ் உட்பட பலர் பங்கேற்றனர்.