கடலுார் துறைமுகத்தில் 4ம் எண் புயல் எச்சரிக்கை கூண்டு

கடலுார்: வங்கக்கடலில் உருவாகியுள்ள டிட்வா புயல் காரணமாக, கடலுார் துறைமுகத்தில் 4ம் எண் எச்சரிக்கை கூண்டு ஏற்றப்பட்டுள்ளது. தென்மேற்கு வங்கக்கடல் மற்றும் அதனை ஒட்டிய இலங்கை கடலோரப்பகுதிகளில் மையம் கொண்டிருந்த காற்றழுத்த தாழ்வு பகுதி, ஆழ்ந்த காற்றழுத்த தாழ்வு மண்டலமாக வலுவடைந்தது. தொடர்ந்து வடக்கு, வடமேற்கு திசையில் நகர்ந்து நேற்று இரவு சென்னைக்கு தெற்கு 490 கி.மீ., தொலைவில் புயலாக மணிக்கு 7 கி.மீ.,வேகத்தில் நகர்ந்து வந்தது. இதையொட்டி, துறைமுகத்திற்கு வெகுதுாரத்தில் புயல் உருவாகி மோசமான வானிலை நிலவுவதை அறிவிக்கும் பொருட்டு கடலுார் துறைமுகத்தில் 4ம் எண் புயல் எச்சரிக்கை கூண்டு ஏற்றப்பட்டது.